Sen crore 2.59 jenjang auyaba gari 37 ngutetogo: Kohima Police

Dimapur, September 19 (TYO) : Nagaland nung garitem kanga bulua auyaba atema Kohima police-i March 19, 2015 nü Anti-Vehicle Theft Squad ka tentet.
Iba teshimtet telok yagi Kohima district nung garitem auyaba inyakyim noktangtsü aser ken o tem bushisüngdangtsü atema mapa lemzüktsü aser parnokji SDPO Kohima-i kübok inyaktsü tashi agütsü, ta Sub-Divisional Police Officer & PRO Kohima-i sangdong ka nung metetdaktsü.
AVTS-i gari auyaba ken o tem bushisüngdanga arudang putet kaji, auertemi tenük yokba gariji mapang tatsüka repranga atar. Parnoki gari kibur inyaksangshibatem mita repranger aser maongka angudang gari auyar.
State ka nung auyaba gariji tanga state kati bener oa ayoker aser iba ya ajanga ozüng amertemi aiben tetsükdaktsü ajurur. Nagaland nung taila registration papers aser taila registration number nungertem zübazüba angur. Khenkhenbo gari tejen ayokertemi gari auyartem den külemi yaritepa inyaker. Gari auyartemi mapang kar nungbo gariji loksar parts agiteta ayoker. Ano, auyaba garitemji ozüng anema mapa inyakdang amshir aser iba sülen toktsür, ta Kohima police-isa ashi.
Gari tejen alinürtemi tamasa gari indang record junga metettsüla aser Police Commissioner Office mesüra District S.P office nungi No Objection Certificate (N.O.C) anguba sülen ang gari tejen alizüktsüla ta parnokisa shisem.
Kohima Police-isa Nagaland nung gari kiburtem dang pei gari nung ‘Anti-theft equipment’ enoktsü atema sangdong nungsa shia lir.
Parnokisa ashiba agi, auyar moutetba garibo mali saka auertemi kanga zübazüba auyar moutettsü atema ‘Anti-theft equipment’ enok nung tajungba. Gari alirtemi factory fitted immobilizer, GPS – equipped systems, pedal locks mesüra master switch nungertem enoksemtsüla.
Kohima Police kübok anti-vehicle theft squad tentetba sülen nungi tang tashi nung auyaba gari 37 ngutetogo aser garitemji – truck (2), Mini Bus (1), Mahindra Bolero (5), Mahindra Pick-up (4), Mahindra Scorpio (4), Tata Mobile (1), Tata Sumo (2), Tata Safari (1), Ashok Leyland Pick-up (1), Maruti 800 (2), Maruti Swift Dezire (1), Maruti Wagon R (1), Maruti Zen (1), Honda City (1), Maruti Alto (1), Hyundai Santro (1), Maruti Van (1), motorcycle (7) lir.
Item gari indang jenjangji crore 2, meyirjang tenem ser tugu shi liasü aser ken o balala nung nisung 32 puogo.
Gari 37 ngutetba nungi gari 15 tashi Chief Judicial Magistrate Kohima tetuyuba nung ajemdaker kiburtem ket nung agütsüogo aser tanüngba garitemji NCRB database nung aliba ama osang sangdongogo. Item garitemji Chandigarh Police, Delhi Police, Assam Police, Arunachal Police, Noida Police, Rajasthan Police nungi osang aruba atar, ta sangdong nungsa shia lir.
District Police-i maneni gari auyaba inyakyim noktangtsü aser auyaba garitem bushitsü merangtsü aser ano külen gari kiburtemia kümdanga alitsü aser gari auyar ora tekaratiba nung iba osang police nem sangoktsütsü mepishir, ta Sub-Divisional Police Officer & PRO Kohima-isa sangdong nung metetdaktsü.
Gari auyartemi gari mashi auyar saka parnoki tenük kanga yokba garitem tsünglanglen agütsür.
I. VFM aser Maruti 800, Alto, Wagon R, Swift, Hyundai Santro, i10 etc amala hatchbacks.
II. VFM aser Maruti Esteem, Dezire, Tata Indigo, Honda City, Toyota Corolla etc amala sedans.
III. Mahindra Scorpio, Bolero, Chevrolet Tavera, Innova, Mitsubishi Pajero amala MUVs & SUVs.