National Youth Volunteer (NYV) Induction Training tenzükogo

Kohima, Mongputeni/October 23, 2019 (TYO): Nehru Yuva Kendra Sangathan (NYKS), Nagaland-i October 22, 2019 Mongolbarnü National Youth Volunteer (NYV) Induction Training sentong tenzüktsüogo. Anogo 15 tashi agitsü aliba sentong ya November 4, 2019 nü tembangtsü, ta sangdong ka ajanga metetdakja liasü.
Iba training sentong ya tesem balala asem – State Institute of Rural Development (SIRD), Kigwema Panchayat hall aser Budget Building, Kisama Village nung agidar.
Kigwema Village Panchayat Hall nung ayongzüka agiba Induction Training sentong nung NCS, Secretary, Youth Resource and Sports, Govt. of Nagaland Alun Hangsing; aser SIRD Conference Hall nung ayongzükba sentong nung Director, Youth Resource and Sports, Government of Nagaland Akumla Chuba na alaktetta tejaoker ama arugi dena liasü.
Panchayat Hall, Kigwema Village (Induction Training) nung Alun Hangsing-i jembiba mapang pai, volunteer tem ajungshi aser kasa mapang yimtsüng aser lokti maparen nung volunteer ka ama tenzüktsü asoshi tongtibang onüktem lemsatepa liasü.
Kasa anogo, State Institute of Rural Development (SIRD) nung Akumla Chuba-ia Sherry Anderson-i ashiba olen “Volunteers don’t get paid, not because they’re worthless, but because they’re priceless.” nung ajemdaker National Youth Volunteer (NYVs) tem ajungshia liasü.
Budget Building, Kisama Village kübok ayongzüka agiba Induction Training sentong nung State Director, NYKS Nagaland & Manipur Jackie Ruivah-ia NYVs tasentem pelashishia agizük aser pai, pei nem nüngloktsüba maparentem temulung agüja aser nendaka inyaktsü asoshi ajungshia liasü.
Maneni, anogo 15 tashi NYKS, Nagaland-i ayongzükba Induction Training sentong nung Nagaland indang district balala kübok RD block balala nungi volunteer 170 agi shilem agidar.
Nehru Yuva Kendra Sangathan ya Ministry of Youth Affairs & Sports, Government of India kübok tentet ka lir.