Kümzük -T. Ken 116:1-11

Tenüngsang Ken 116 shibai zülu pa timtem tia kar ajanga aoba iba ken nung zülu. Shitakba nung pa tasür liasü. Saka Kibubai pai ayimtenba angashi aser kümzük, aser iba indang pai zülu, “Ni Kibuba meimer kechiaser Pai kü ola aser kü temepishiba angashia lir, kechiyong Pai kü dangi Pa tenarong shitsür, aji asünung kopika ni taküm lidir ni papikaji ni Pa ajatsü” (t.1,2).
Tsüngremi Pa tila tanur dangi tenarong shitsüba noksa jagi Pai angashitsü asoshi asenok anasai aruba indang sayur. Junga aser jangjaa angashitsü asoshi tangari asenok den jembidang asenoki anasai orr angaa alir. Tsüngremi teti asenoki jembiba angashir, yaritsü asoshi teti asenok anasa alir. Ken züluri asenok dang ashir, “Kibubai tongmelang pur awabanga ayur; ni tajemzükba kümdakja liasü, aser Pai ni kümzük” (t.6). Asenok kümzüktsü asoshi Tsüngremi asenok alidaki arur aser Pai asenok kechi koma südaktsüner yamaji kümdaktsür. “Kechiyong tasü nungi kü taküm, nüktzü ayimba nungi kü nük, aser laoba nungi kü tetsüng nai kümzük” (t.8).
Ken züluri Tsüngrem taochi angu. “Kibuba taochi aka, aser temeshi lir; hau, asen Tsüngrem yimlibilem lir. Kibubai tongmelang pur awabanga ayur; ni tajemzük kümdakja liasü, aser Pai ni kümzük” (t.5,6). Tsüngremi pa tasü nungi kümzük aser pa nüktzü kongdaktsü. Pai tashi itdaktsü aser malangtsü pa tetsüng kümzük.
Asenoka Khrista ajanga iba teyari kar. Paji taochi aser yimlibilem adokdak lir. Ken züluri ashi, “Tasüba lisü agi ni mesangbangogo” (t.3), saka tanela nung pa masü. Yisu pa melena asü.
Na tanü Tsüngremer tekümzükba nüngdaker asü? Pai ne dang angashir aser yarir, pelaang. Ne nüngdak ajak Pa teperiba teka nungi arur. Pa taochi aser yimlibilem lir. Pa tenüng nung jang; Pai na kümzüktsü.