NH 29 atema traffic tetuyuba agütsür

Dimapur, October 28 (TYO): Anentsüh agi NH29 kübok tesem aika anenbanga lir aser lenmang lapoktsü atema tang mapa teinyakdak lir. Anungji lenmang sadema melapok tashi traffic tetuyuba kar agütsür ta PRO DEF, Kohima-i metetdaktsü.
Kohima aser Dimapur tsüngda senzüba gari tulutem Kohima-Zhadima-Phekerkriema-Niuland tsütsü senzütsü. Iba lenmang nung ‘one way traffic’ dang asütsü anungji Kohima nungi alurtem 12:00 (ayaterm) nungi anepdang 6:00 ako tsüngda aser Dimapur nungi aturtem 12:00 PM (anüngdang) nungi nikongtsütsü 6:00 ako tsüngda senzüdaktsütsü, ta PRO-i ashi.
Iba lenmang nung passenger bus gari ajak Kohima-Tsiesema (10th Mile)-Peducha ajanga senzütsü. Ano, Kohima aser Dimapur tsüngsa senzüba gari tilatem Kohima-Jotsoma-Khonoma-Mezoma-Zubza ajanga senzütsü, ta PRO-isa metetdaktsüogo.
Maneni, Addl. Dy. Commissioner of Police/PRO, Dimapur-ia tanga sangdong ka nung NH 29 nung traffic atema osang ka metetdaktsüogo.
Kohima-i atuba gari tilatemi 7th mile new D.C office – Shokhuvi – Razaphe – Mhaikam – Pimla – Mhainamtsai – Jhornapani / Medziphema ajanga senzütsü metetaktsür, ta sangdong nung shia lir.
Dimapur nungi tanga district temi aoba truck aser bus gari ajak Patkai bridge – Seithekima – Niuland – Zhadima lenmanglen senzütsü. Dillai aser Newfield check gate nungi Dimapur telungi truck gari aittsüba mapang anüngdang 12:00 ako nungi nikongtsütsü 6:00 ako tashi lapoktsür, ta Addl. Dy. Commissioner of Police/PRO-isa metetdaktsüogo.