Oshi-oben aser Kaket ken o ajanga kin ka jangjatsür

~ L. Kika Pongener.

Kechi kin sudir suaka Oshi-oben aser Kaket ken o nung tejakleni aoba ajanga kin kaji tashitemetet kin ta jangjatsür. Ao kin Naga nunger ajak dang tamasa Khristan yimsu agizükba den külemi shisaliok nung nuji akümba ajanga tashitemeteter kin ta aja. Naga nunger tangar kin shinga pei oshi nung laishiba aser ken kaket adoka mamshidang Aor-i tamasa amshi. Ao kin kanga tia kaa Dr. Clerk-i ‘Ao Dictionary’ kaket tilaka adoka yutsüyong ibaji tajemtakdak sur asen Ao kin kaket ken o nung tenuk lapokdaktsü. Ano iba den asen lennir mezüngbur shirnoki ‘Laishiba’ & ‘Ken kaket’ asen oshi nung meyipzüka yutsüogo, aser ano ‘Ao osep’ Dr. Clerk-i zülua yutsüba nung metenloka tera yanga yutsüogo, parnok nem tenungsang agütsütsü kanga dang tetemsü, kechiyong kechi mapa sudir suaka mezüng tenzüka inyaktsübaji temela masü.
Aji oda, mezüng tenzüka inyakba nungji metokmeperi aser temetongshitsübo karbo alitsü sudi, saka ibaji mezüng tera ayangdak mongchen lir. Asen Aor ya oshi asem-pezü jembiba kin lir, ajioda, tip külen shisadangra oshi aika jembibaji maongka tulu ta ashitsü akok, saka ano tip külen bilemdangra oshi aika jembiba ajanga nungjakoja/jayajako aisu nung liromemedemer. Ano junglir rongnunga yim shia ola-osu-oyim aser nungjakoja/jayajako kar-kar nungbo liromemedemba-a lir. Ashiko, kasaji mongsener-a yim shia ola-osu-oyim aser nungjakoja/jayajako kar-kar nungbo liromemedemi alitsü akok. Iba jagi ‘Calendar’ & ‘Dictionary’ adokba nunga obang mapur aser liromemedemer sudi ta bilemer, kechiaser yim shia-i pei pei yimer-i jembiba/ajaba/amshiba hesap nung agitsü merangdang tanü tashi tatempang kati maruteti ashishiteper. Ashiko, tang teinyaktak ASLB züngsem ya anener tanga tasen ka shimer tasen ka yanglushia tenzüka ao nunga, iba nungjia yimtsüng karibo nunga ta ashishitsüsa adoktsü-a kecha meteta maka, kechiyong shiyunga aruba ama yimtsüng shia ola-osu-oyim aser nungjakoja/jayajako liromemedem aisu nung lir. Ni amanger tang teinyaktak ASLB ya lokti mongdang ka nung teloki tenung teta shimba asütsü sudi, aser parnok nema teinyaktsü jurila tashi karbosa agütsür alitsü sudi ta bilemer. Anungji tang ASLB-i kechi tashi-ka adoktetogo, aji parnok nubo, mapang aser rongsen jenti endoka inyakerang adoktet. Ajiser, iba nungji temetongshitsü aser teinoksemtsü lira agütsütsü atema osang kaket nung sangdonga nubortem nem mapang peria agütsür külenang tatem küma renem sudi ta bilemer.
Ano iba den yimtsüng balala nung kenshi-oshir, kaket zülur, yimtsü-yimbo teshimtet lennir aika den asüngdangtepa inyakba, ano oshi-oben tarok meteter, kaket ken o nung takotet lennir aika nem ‘Osep draft copy’ lema agütsür, parnok nungi temelenshitsü, teintoktsü, tebendenloktsü aika ngua item ajakji melenshir/enoksema inyakba, aser ano yimtsü-yimbo lennir tajung aika nungi ‘Ojangtem’ zülu nung bendena inyakba, ‘Arok Osep’ okila nung chief editor-i zülusema nguogo. Aji oda, nisungi dang inyaker asünungji metokmeperi/temetongshitsü/teinoksemtsü karbo alitsü akok, anungji shirnokisa kechisa temetongshitsü/teinoksemtsü tuteta sayur item ajakji taitsüba ama masü, saka arok ajungtsü asoshi teyariteper ka ama teinyaker-ia agizüktettsüla. Kechi mapa inyakdir inyakaka ajak tabensabo shingaia meinyaktettsü sudi, aser khen inyakbaji aji tatempang masü, ano iba nungji taruba edition nung teimba/tabensaba/tajungba bendenloka inyaka aotsü. Anungji tarutsü nung ASLB züngsem tasen shimtsüsa mapangi bentsür arura, kokrabang Language nung Doctorate angur den, Ao oshi nung M.A. azünger aser Degree tulusa manguyongjia, Ao oshi-oben tarok meteter kenshi-oshir/yimtsü-yimbo karbosa anioksemer inyakdaktsütsüla. ASLB nem lokti-i tashi agütsür nungloktsüba ama parnok nubo, mapang, rongsen jenti endoka meranga inyaker tang koba tashi-ka inyakteta lir, aji nubor ajaki temulung sua agizüktettsüla. Aji oda, nungjakoja/jayajako karbo Aor yimtsüng ajaki liromedema jembiba/amshiba asütsü akok, mesura ano karbo yimtsüng kari dang jembiba/amshiba asütsü akok, ajisuaka kodang ibaji agidi ta Aor ajungai obang ka sur mulunga agizükdir aji arok meyong akümtsü. Ashiko ASLB-i tang kechi adoka lir ibaji School, College aser University level tashi nung course küma amshitsü agüjadoker alitsüa akok.
Aji oda, maparen ajunga tembanga inyaker mapang talangba ka suia oadoker, ano khen tanaben majangi lur tenzükshi nungbo ashiko tajung melena tetsükdaktsü-ang tuluba adoktsü akok, aser idangji kaketshirtem aika takoksa tia ajurutsü sudi. Anungji tang kechi tashi-ka inyaktetogo iba nungji kangasa yabo memelenshira majung ta asüba kar lira, takoktsü lenmang dang lirbo itemji melenshitsüla. Ajiserbo, tang adoka aliba ya nubor ajaki mulunga agizüka amshia atar, memenui tarutsü nung teimba/tabensaba/tajungba bendenloka inyaktsü bilema alitsüla, kechiyong tang kechi adokogo aji tatempang masü. Aji oda, ASLB-ia tarutsü nung tajungba bendenloka, melenshia, yanglushia inyaktsü atema lenmang sadem-sadema dang lapokja aliba angur. Ano mapang shia asen Aor kenshir-oshir, oshi-oben tarok meteter lennir tajung aikati ‘Zonizüng’ aser ‘Arok osep’ nung temelenshitsü aser teinoksemtsü kechisa ajiteta osang kaket nung adoktsür, item ajakji arok ajungtsü asoshi tajungba/shitakbaji aginuyong mapang endoka bushir/bendener adoktsür, anungji teinyakertem-ia parnok mapa nung tai apur ama mebilemi tarutsü nung tajungba yanglushitsü atema pelaseta agizüktsüla. Temalen zülusemba ama-to Ao kinji tashitemeteter kin ta Naga nunger kin ajungai züngshir, aser tangar Tenyimia kinbo joko University level tashi nung course agitettsüsa renemtetogo, saka asen Aorbo tanü tashi nung iba tashi ya adokteta yur, osang kaket nung tanen maka asatepba ya tangar kin matsüngdang taaktsü-ka lir. Anungji tang kechi tashi-ka adoktetogo aji amshia atar tarutsü nung memenui tajungba/tabensaba yanglushir adoktsü ajaki bilema alitsü asoshi kü jurila tangatetba olen ka lemsateper.