Manipur nung National Unity Day amung

Imphal, Mongputeni/October 31 (Agencies): Coordination Committee on Manipur Integrity (COCOMI)-i state ajunga mokdanga ayutsü ayonger liaka Manipur nung Brehostibarnü National Unity Day mungogo.
State Youth Affairs aser Sports Ministry-i achaayanga Khuman Lampak Sports Complex nung ‘Run for Unity’ sentong ka ayongzüka agiogo. Run for Unity marathon ya Youth Affairs and Sports Minister Letpao Haokip-i, Education Minister Radheshyam Singh, Lok Sabha MP Dr RK Ranjan Singh, Chief Secretary of Manipur Dr Suresh J Babu aser Youth Affairs and Sports Ministry ketdangsertem matsüngdang tenzükja liasü.
Iba sentong nung National Sports University nungi kaketshirtem, Para Military sepai aser state nung asayar aikati shilem agiogo.
Rashtriya Ekta Diwas ya Sardar Vallabhbhai Patel asoba anogo nüngtem nung amunger. Sardar Vallabhbhai ya India nunger politician ka liasü aser pai India nunger nüjiso asoshi raraba mapang tongti shilem agi aser iba sülen linük longjemshiba nung tongtibang shilem agiogo.
2014 Centre nung sorkar tasen tentetba mapang October 31 ya Rashtriya Ekta Diwas anogo ama amungtsü telemtetba agi.
Nüjiso anguba mapang chuba-i yimsü süa aliba state tem Indian Union nung adentsü asoshi inyaksangshi nung Sardar Vallabhbhai Patel-i kanga tongtibang shilem agiogo. Anungji pa asoba anogo, pai inyaktetba mapa tajungtem benjunger.
Kasa anogo COCOMI-i tamangba yimsü aser ki kecha mebendangi nüburtem dang pei mapa ajak toktsür Manipur litsü kümzüka ayutsü asoshi nokdakba sentong nung shilem agitsü asoshi ayongzüker liasü.