Reang refugee temi Tripura nung lenmang mokdanga ayu

Agartala, Mongputeni/October 31 (Agencies): Refugee camp temi chiyongtsü yoka aliba nokdangba sülen Brehostibarnü Reang refugees 500 dak temai Dosda nung Lakkhipur aser Anandabazaar nung lenmang mokdanga ayu.
Ketdangsertemi, lenmang mokdanga aliba lapokdaktsütsü asoshi refugee tem den meranga jembidangdar, ta osang ajanga metetedaktsü.
Küm ana tsüngda Bru camp tem nung tang agi tasembenbuba chiyongtsü meyoki nokdanga yuogo.
Brus (Reangs) nungertemi Mizoram-i meyipa aotsü asoshi memulungba shia Ministry of Home Affairs (MHA) chiyongtsü belenba nokdanga ayur, ta aitsüogo.
Camp tem nung alirtemi taoba mapang, parnok nem chiyongtsü magütsüra sorkar indang chiyongtsü bendena ayuba godown tem rakpoka auyatsü ta amokmerenogo.
Ration supplies, cash dole aser tanga maongkatem North Tripura district kübok Bru relief camp trok nem September 30 nü nungi magütsüi arudar kechiyong parnoki Mizoram-i meyipa aotsü memulunger.
1997 October ita kin o kin tsüngda mepetmesü adokba sülen Mizoram kübok Mamit, Kolasib aser Lunglei district tem nungi Bru nunger 37,000 shi jena ao.
Parnok ya North Tripura district kübok Kanchanpur aser Panisagar sub-division nung relief camp trok nung jenoka lir.