Meghalaya sorkari CAB pumasemer; Conrad

Shillong, Mongputeni/October 31 (Agencies): Meghalaya chief minister Conrad Sangma-i Bodhbarnü, state sorkari Citizenship Amendment Bill (CAB) pumasemer ta nenshia metedaktsüogo.
Meghalaya Residents Safety and Security (MRSS) Act, 2016, Sixth Schedule aser CAB dak sendakba nung party ajak nungi parnok tebilemba angadangtsü asoshi senden amenba sülen Conrad-i iba olen lemsatepa liasü.
CAB dak sendakba nung sorkar tenokdakdak indang jembidang Conrad-i, “mezüng anogo nungi state sorkar tamendakdak tejangja aser sorkari iba bill pumasemer,” ta ashi
Iba senden nung political party tenet nungi lenirtem dena liasü.
“Political party ajaki parnok tebilemba lemsatepogo aser onoki parnok dang tezüluba nung agütsütsü mepeshia asüngdangogo,” ta paisa ashi.
Paisa, state sorkar aser political party ajak tamendakdak kasa dang lir, ta ashi.
Union home minister-i state sorkar, political party aser lokti tentet balala den tongtepogo aser paia iba CAB nung sendaka aliba ken o angatettsü asoshi osang agitepa arudar, ta Conrad-i ashi.
“State sorkari koma shilem agitsü aser Meghalaya densema northeast nung aliba state tem koda kümzüka ayutsü iba indang sensaksemogo. Item tebilemtsütem ajaka temai bener adokogo aser tang ken o asadangba mapang lir, aser MHA-i onok dang senden ayonga akatsü mepeshia asüngdangogo. Onoki political party tem tebilemba angadangogo,” ta pai ashi.
Chief minister-isa NE nung political party ajaki CAB anemer ta Delhi-i jangjaa lir ta ashi.
“Centre-i onok dang koba onük anemer ta asüngdanger. Anungji ken oa ashishitepdar aser ibayongji arok tebilemtsü metetdaktsütsü atema longjemer inyaktsü asoshi political party tem senden ayongogo.
“Taoba mapang ken o junga masadang, kechiyong parnoki Lok Sabha nung odang benok aser agizük. Ajisüaka tangbo lenla balaka nungi iba ken o achaayangdar ta ni bilemer aser MHA-i onok aser tang stakeholder tem tebilemba angadangtsü asoshi arutsü ta imlaa atar,” ta CM-i shisem.
Congress-i MRSS Act anemba dak sendakba nung Conrad-i ashiba agi, Act benoktsü asoshi inyakyim ya jenjang balaka, saka state-ia iba Act tashi taitba kümdaktsütsü asoshi iba ya amend asütsü nüngdaker
Entry-exit points dak sendakba nung CM-i, “Mendipathar Railway station nung entry-exit point ka amenoktsü aser iba ya takaratiba nung mapa küma inyaka aotsü imlar. Mapa agi dang sayutsü,” ta ashi.
Sixth Schedule amendment indang jembidang CM-i ashiba agi, political party temi parnok tebilemba benokogo aser tongtibangtibaji ‘unrepresented tribes’ dak sendaka liasü.