J&K aser Ladakh UTs Lt Governors tenangzükba agi

New Delhi, Mongputeni/October 31 (Agencies): Jammu & Kashmir state agi Union Territory ana küma lemsaba sülen Brihostibarnü UT ana atema Lieutenant Governor tenangzükba agiogo.
Tanü Raj Bhavan, Srinagar nung Jammu & Kashmir nung mezüngbuba LG, G C Murmu nem J&K High Court Chief Justice Gita Mittal-i ketdangsüa tenangzükba agidaktsüogo.
Murmu ya Gujarat nungi 1985 batch IAS officer ka lir. Tenangzükba agiba sentong nung BJP lenir, Jugal Kishore aser Rajya Sabha MP aser PDP züngsem Nazir Laway na densema nisung 250 shi aden.
Ano Union Territory of Ladakh nung mezüngbuba Lieutenant Governor inyaktsü atema taoba mapang bureaucrat Radha Krishna Mathur-i tenangzükba agi.
Taruba ita arishi küm 66 ajungtsü alisang, Radha Krishna Mathur nem J&K High Court Chief Justice Gita Mittal-i ketdangsüa tenangzükba agidaktsü. Iba sentong ya Leh nung aliba Sindhu Sanskriti auditorium nung agi aser sentong nung Leh nungi ketdangsertem, Kargil hill councils, Army aser paramilitary forces, tamangba yimsü lenirtem aser public dena liasü.
Mathur ya Tripura nungi 1977-batch IAS officer ka lir. Pai ashiba agi pai tamalen backward aser border areas nung inyaka liasü aser taoba mapang Tripura chief secretary aser defence secretary-a inyakogo.
Indian Union kübok tang mezüng state ka agi Union territories ana küma lemdanger, aser tang UT tasenba ana densemabo India nung UTs 9 kümogo aser state 28 kümogo.
Taküm August 5, 2019 nü Centre sorkari Jammu & Kashmir nung Arrla 370 agiener Union territories ana akümtsü sangdonga liasü.