SSB tekaraba nung tentettsüla: PSAN

Kohima, Mongputeni/October 31 (TYO): State nung küm piyong departmental exams balala ayongzüka agir aser iba dak sendakba nung Public Service Aspirants of Nagaland (PSAN)-i Nagaland sorkar dang Staff Selection Board takhangba atangji nung ataloktsütsü maneni akhanger, ta Media Cell, PSAN sangdong ajanga metetdaktsü.
“Tejangrar candidate meyirjang aikati department balala nung clerical mapa atema tenüng agütsür, anungji tekaraba nung SSB tentettsü kanga rongdak nüngdak kümogo. Departmental exams nung melung malemtsüsa adoker, anungji Grade III post ajak atema state nung SSB tentettsüla; iba denji külemi kecha tashishitsü makai shimtsü aser Nagaland nung lanurtem tsüngda tajungtiba apir shimtsü atema NPSC küboki maitdaktsütsüla,” ta kasa sangdong nung shia lir.
“PSAN-i mapang talangka nungi SSB akhanger aser Nagaland nung lanurtemi temelenshi atema mapang talangka nungi yongyar. 2016 küm nungi PSAN-i SSB ya rongdak nüngdak ta shia sorkar nem temepishiba shidi aika agütsüogo, ajisüaka telangzüba mali. Sorkar balalai ibaji reprangshitsü ta shiogo, ajisüaka SSB tentettsü atema temelung magütsür,” ta PSAN sangdong nung shia lir.
“Anungji PSAN-i yimsüsürtem dang ya nenshia ashitsüsa akümer- nenok teinyaktsü mapaji backdoor appointment orders agütsütsü atema masü saka sensotem aintsü aser renloktsü atema asalentong yanglua inyaktsü asoshi lir. Nagaland nung tebilemtsü tulutiba rongnung kaji mapa manguba tebilemtsü ya lir, aser backdoor appointment ajanga ano iba tebilemtsü ano tamajungba ang kümdaktsür. Iba ya asen lokti nung cancer tashidak mesüka kümogo, aser iba tebilemtsü atema taneptsüji SSB ajangadang angutsü. Anungji PSAN-i maneni Chief Minister aser par külem tenzükertem dang zünger aliba Naga nunger tarutsü atema tekaraba nung SSB tentettsü mepishir,” ta parnokisa metetdaktsüogo.