Benreu nung Kwakpwa Lamsimngyi Mini-Hornbill Festival among

Kohima, October 31 (TYO): October 31, 2019 nü Mt. Pauna Tourist Village Benreu nung Kwakpwa Lamsimngyi Mini-Hornbill Festival mongogo; iba sentong nung tetushi tejaokerji Nagaland Chief Minister, Neiphiu Rio liasü, ta ketdangsertem osang ka ajanga metetdaktsü.
Lamsimngyi ya Zeme nunger tongti benjung rongnung ka lir, aser iba benjung ya küm shia October ita tatembanglen mesüra November ita tetenzüklen kanga longsolongbena amonger.
Lamsimngyi mesüra Kwakpwa ngyi ta ajaba benjung ya tsürabur aser kibong kümer aliba jala/jabasotem kibong tsüngda; aser kinünger kibongtem tsüngda tesendaktep yanglushiba benjung ka lir. Iba benjung mapang nung teburtem aser lanurtem tsüngda saisapong tetoktepba balala agir. Mezüngbuba anogo nung parnoki chiyungtsü tajung anepalur kibongtem tsüngda lemsateper, koba dang Kwakpwa & Hetamram ta ajar.
Yimtsüng kar nungbo iba anogo nung kibong akümtsü mapang ana nung alir aiürtemi tesüsabuba aiwa amonger. Iba dak alia tetsürtemi arishi küm lemsar telok-telok benjungtepa külemi amonger aser iba mapang nungji teburtemi ki mapa inyaka tanurtem repranga atar.
Iba sentong nung jembidang Chief Minister, Neiphiu Rio-i Naga nunger sobaliba balala süaka longjema aliba indang jembiba den külemi peipei sobaliba aser inyakyim tajung ajungkettsütsü aser wazüka ayutsü ajungshi.
Benreu ya Tourist yimtsüng ka asünung Rio-i yimdaklirtem dang merükmeju nung ano taliba temelung agütsütsü ajungshi.
Chief Minister-isa tourist Log Huts tasen ana semzükja liasü.
Log huts semzükba sentong ya Dr. Lungsang Nsarangbe & Kebana Thou na leniba nung agi, Deputy Commissioner Peren, Sentiwapang Aier-i okila jembi, Advisor for Tourism, H. Khehovi Yepthomi-ia o tatsüka jembi aser Kengim Kulimbe-i tepela anküp o jembia liasü.
Heningkunglwa, Mpai aser Benreu yim nungi lanurtemi sobaliba saisapong balala- Naga Wrestling, Hezwa (Long jump) aser High jump (Heram) saya.