PAC Convener & Co-convener dang mepelar: WC, NNPGs

Dimapur, November 6 (TYO): Chakhesang region kübok Vekhosayi Nyekha aser Sumi region kübok Ghokheto Chophi na lenisüba kübok Public Action Committee (PAC)-i mebilemdangi mapa inyakba atema mepelar ta WC, NNPGs-i metetdaktsüogo.
Telok balalai ozüngi memelaba sen saruba ya nübortem asoshi timtem tulu ka kümogo aser iba ya Naga nungertemi azüokdaktsünür. Ajisüaka, designated camps, units aser regional commands nung Naga Army aser civilian national worker tem Naga nunger aser shishilembartemi tenla agütsüba ajanga dang takümtem liyonga arur, ta WC-i sangdong ka nung ashi.
Naga nunger asoshi yimten tsütsü tongtipang mapang ka ajurua lir. India sorkari Naga yimten tebilemtsü kanga junga angatetogo saka yangi PAC-i WC, NNPG anema mapa inyaker aser anogoshi pei tepok mesütsü atema angudak shibangtsüogo. Iba ajanga Naga nunger maitsü, yimjung aser tarutsü tajung atema inyakertem timtemdaktsür, ta Media Cell sangdong nung ashi.
Tarutsü itatem Dimapur aser tanga centre tem nung linük tenzükertemi shishilembartemi mulungsoa tenlaba dak dang metaloktsüsa akümtsü. Iba tensa nung ajemdaker, India sorkar den tatembang tenangzüktep ka magi tashi, PAC Convener V Nyekha aser Co-convener Ghokheto Chophy nati Naga yimten atema maparen inyakertem peritsüsa chiyungtsü aser senotsü agütsütsüla, ta parnokisa ashi.
PAC-i ashiba angaa mulungsoa tenla agüsüba aser sen tera saruba samatsüogo aser linük tenzükertem kidang nungi pur orr tepuokdak ayur. Naga linük tenzükertemi kodaser Naga nunger dang nungi sen mesarutsü’ar PAC convener aser Co-Convener nati anogo pezü tsüngda telangzüba agütsütsüla, ta WC, NNPG-isa metetdaktsüogo.
Tanur asotsü tetsü ka nem tamashi nurse kati dang chiyungtsü magütsütsü. Iba tensa nung linük tenzükertem achiajem mengui timtem kar danga ajurura, iba tebilemtsüji V Nyekha aser Ghokheto Chophy nati abentsü, ta parnokisa ashi.
Naga yimten latettsü mapang ka nung PAC-iba anema aser tebilemba tamajung bener mapa inyaker. Naga nungertemi tarutsü tajung ka atema teimla yur aliba mapang PAC-i meputep adokdaktsütsü aser yimten latetba onük —– toktsütsü meranger, ta
V Nyekha aser Ghokheto Chophy tsüraburtemi Naga yimten asoshi inyakba mapa nung shilem agiba mesüra magiba tenük yokdar, kechiyong tenati inyakba mapa ya Naga yimten mapa anema lir, ta Media Cell-isa metetdaktsüogo.