School kiburtemi raksar

Nagaland nung government school-tem mejungi akümba ya school reprangtsü nungloktsür kiburtem majungba agi majunger ta putetogo. Item school reprangtsü nungloktsüba kiburtemji government masü saka Village mesüra Ward Education Committee purtem lir. Nagaland nung government school lapoka kaketshisatsü sayuba otsü ya Nagaland state kümer dang yimtsüng shia school lapokyonga aoba mapang nungi tenzükba otsü lir. Iba mapangbo Naga nungertem rongnung tesayur inyaktsüsa tazüng-temetetter peria malinungji, class 6 tashi azüngba purtemiang kaketrejutem nung sayutsü tenzük. Item tesayurtem asoshi kaketreju nung kaketshirtem dang azüngtsü aser zülutsü sayutsübaji Tsüngrem tenzükba wadang nung inyakba den kasa tangatetba nung bendanga agüja inyak. Tanü Nagaland nung government mapa nung tain rogotem ya teimbaka government school nung item tesayurtem jagi sayuba purtem asütsü. Ajisüaka, tia majung, 1980s tatembanglen ka nungi government school-tem ya mejungi akümtsü tenzük aser tesem ajaklen private school lapokyonga ao. Iba mapang angati kaketshisatsü angazükdak government school-tem toktsür sen agüja azüngba private school-tem nungang tazüngertem teimba küma ao. Aji oda, lia lia government school-tem ya kibur maliba school amai küma adok aser private school-temang kiburi temulung agüja reprangba kaketreju küma adok nungji, government school aika nung tanurtem dangbo tesayurtemang teimba kümadok. Ibaji dang masü saka government school kar nungbo tazünger kaketshir kata mali ser school shibangtsüsa küma lir. Item tensa tia jagi Nagaland nung government school tajungba kümdaktsütsü asoshi küm 15 jakdang state government-i government school-tem ya government meyongbo government meyong asütsü aser senotsü aser nüngdak ajak government-i agütsütsü saka tereprangbo school lapoka aliba tesem nung alir yimten aser lokti lenirtem nem reprangdaktsütsü asoshi “communitisation” sentong ka tenzük. Iba sentong ajanga school lapoka aliba yimtsüng aser kiyong yimten nem school reprangtsü asoshi tashi agütsü. Ibayongji, yimtsüng aser kiyong shia shimba Education Committee-jiang school madakbo government aküm. Joko, school reprangtsü purtemji talang nung Secretariat, Directorate mesüra District aser Sub-division nung aliba Education officer-temi masü saka yimtaklirtemi mesüra kiyong nung alirtemi dang pei school reprangtsü nungloktsü nungji, anogo shia school nung lia tesayurtem den shisalemsatepa school nüngdak reprangtsüa koka kümdaktsü. State nung government school jungdaktsütsü asoshi iba sentong dang nungibo tajungba government-i meinyaktettsü südi. Ibayongji, iba sentong ajungba reprangteta Nagaland nem United Nations-i dena sempet agütsüba otsü lir. Ajisüaka, tezüdangtsüka, school aika nung Education Committee ali mali memetet inyaker aser Education Committee purtemi meteta tesayurtem kecha kuli melii school-i marur aser ano aikati pei melen tangar yoker. Item proxy tesayurtemji aika puteta odagi. Nisung ka school nung tesayur inyaktsü shim saka pai mesüra lai pa mesüra la melen tangarang ka pa mesüra ita sen nungi tesadang ka shimer Education Committee den angatetteper sayudaktsür. Tesayur meinyaknüseti inyakba tesayurtem o Education Committee naji komaka angatettepar ashitsüa makok, saka pei melen nisung ka pei ita sen tesadang ka agütsür sayudaktsüba nisung aser pa mesüra la tangatetba shisatsüji tesayur inyaktsü metemsü. Kechiba Education Committee-i tesayurtemi school nung junga mesayuba aser pei melen tangar yoka sayudaktsüba mapatemji menokdangtetter ? Tanü government school nung sayutsü shimba tesayurtemji junga azüngba aser junga training agiba purtem lir. Ajisüaka, tesayur inyaktsü shimba aser training agisang aser agilai parnok melen tangar training magirtemang kaketshirtem dang sayutsü yokbaji, pei lima aser nübortem ashioktsüba mapa ka lir. Yamaji shingaia meinyaktsüla aser Education Committee purtemia school junga anepalubaji tarutsü putu junga kümdaktsünüba agi anepalur ta angatteta, pei alidak lapoka aliba government school-ji pei meyong school ama anepalutsüla.