Gari senzüsenpongtsü tetuyuba agütsü

Dimapur, Yimpoksüi/November 12 (TYO): Tzünglur medangi aruba ajanga raksatsüba Dzuda (hydro) apu aser NH-29 nung KMC jana bendenba tesem tejenba len lenmang yanglushiba nung timtem madoktsü atema iba lenmang nung gari tulu senzütsü memelatsü. Kasa mapang nung Kohima nungi Dimapuri aluba gari tilatem Jotsoma bypass lenmang len nungi senzütsü tuyuogo. Gari tetsüng trok adenba gari tulu aser passenger abenba buse tem Tsiesema-10th mile -Peducha lenmang nung senzütsü tuyuogo.
Kohima Police-i ainlen senzürtem dang iba metongmejen arema senzütsü epeshiba den osang magütsü tashi tang agütsüba tetuyuba sülen anidaktsü metetdaktsüogo, ta PRO, DEF, Kohima sangdong ka ajanga metetdaktsü.