Naga nunger atema putu tasen ka tenzüktsü: S Pangnyu

Kohima, November 12 (TYO): October 31 nü Centre aser Naga yimten teloktemi lemtetba ama kobi melii Naga yimten ken o atema telemtetba ka agitsü, ta Health & Family Welfare Minister S Pangnyu Phom-i ashi.
“Naga nunger atema tapu tasen ka aser putu tasen ka tenzükogo. Talisa iba putuji lanurtem atema tenzükogo, anungji Naga nunger kati ka angatetteptsüla” ta Pangnyu-isa ashi.
Mongubarnü DUDA Guest House nung Eastern Yingnyu Union Kohima (EYUK) silver jubilee benjong nung jembidang pai iba osang metetdaktsü.
Naga sobaliba aser inyaksangshi indang olen ka ashidang “iba ajanga Naga nunger kin balala süaka longjema lir ta asüba sayur. Kin shia indang sobaliba aser inyaksangshi balala lir aser kin shia pei pei hohotem kübok alir” ta Minister Pangnyu-i ashi.
Longleng district nungi Phom nunger longjema aser ka kümer aliba atema tenüngsang agütsür. Lanurtemia iba mapa tajung ya ajizüka benshitsüla aser iba ajanga tangari nenok akhümtsübutsü, ta paisa ayongzük.
Sakshi, Yimchang, Anching, Yongphang, Yangching, Pongo aser Hungnyu senteper EYUK tentetba ya tangari ajizüka benshitsü mapa tajung ka lir. Jubilee ya tesüiba meyipa reprangshiba mapang ka lir aser idangji tamakok aser takoktem ajiteta tarutsü atema sentongtem yanglur, ta Pangnyu-isa metetdaktsü.
Alima ainba aser Information Technology kanga renlokba ajanga lanurtemi Naga nunger ajak ajungtsü atema tebilembatem aser shisatsü lemsateptsüla, ta paisa ayongzük.
Iba sentong nung Phom Union Kohima President Y. P. Along, VCC & VDB Association Sakshi Area Chairman P. Bungnga aser mezüng kimen L Bangshing nungertemia Kohima nung aliba Phom nunger ayongzüka jembi.
Sentong nung EYUK president T K Metchei-i tesentepertem pelaa agizük, Kohima Phom Baptist Church Associate Pastor H Paman Büchem-i temoatsü meshia sarasadem aser Jubilee planning committee Chairman C. Danted Phom-i anküp tepela o jembi.