Nagaland nung küm shia cancer agi shiranger 600 shi puteter

Kohima, November 12 (TYO): Nagaland nung kümshia cancer agi shiranger nisung 600 shi ka puteter. Anungji tanü asenoki moko, yi aser sobaliba chiyungtsütem achiba indang osangtem prokshitsü kanga nüngdak kümogo, ta Population Based Cancer Registry, Nagaland atema Principal Investigator, Dr. V. Khamo-i ashi.
2009-2014 tsüngda Nagaland nung cancer agi shiranger 3348 liasü aser küm shia cancer agi shiranger nisung 600 shi tasen puteter, ta laisa ashi.
Cancer Survivors Fellowship, Kohima indang sentong nung jembidang Dr. Khamo-i iba osang lemsatep.
Iba sentong ya Celebrating Christ with love, joy, peace and hope’ omen nung ajemdaker Population Base Cancer Registry, Naga Hospital Authority Kohima (NHAK) den yaritepa ayongzük.
Nagaland nung teburtem dak tekong aser terok cancer (Nasopharyngeal Carcinoma) 19.27%, iba sülen tepok cancer 17.8% aser terok aser tepok tsüngda cancer (Oesophagus) 13.8% adoker, ta Dr Khamo-i ashi.
Tetsürtem dak tepoklang/nu menden cancer (Cervix Uteri) 16.7%, iba sülen mama cancer 12.6% aser tepok cancer 11.1% adoker, ta laisa ashi.
Nagaland nung cancer agi shirangertem puteta aruba indang Dr. Khamo-i lemsatepdang “2009 küm 371, 2010 nung 534, 2011 nung 505, 2012 nung 662, 2013 nung 635 aser 2014 nung 641. Iba nungi tebur 2,034 aser tetsür 1,314 liasü” ta ashi.
Nasopharyngeal Carcinoma ya tangalenbo kangabo madoker saka India kübok Northeast state tem nungi NCP cancer ya kanga bulua adokba bushitetogo. Northeast nung tetsür aser tebur dak iba cancer ka adokba state ji Nagaland lir, ta laisa metetdaktsü.
“Nagaland nung cancer agi shirangbaji stage III aser IV tashi nun gang puteter aser iba jagi parnok kümzüktsü kanga tasak akümer. Tashidak menur ang putetbaji mapang shitak nung temang anepalu masüba, osang tejangja memetetba, screening programmes shitak magiba aser anepalutsü facility tajung maliba ajanga lir. Iba den külemi yimtsüngtem nung alirtemi health care facility tilatiba tashi mangur” ta Dr Khamo-i ashi.
Cancer khuret ajema kümdaktsütsü atema asenoki tanü iba osang sangdongtsüla aser moko, yi aser sobaliba chiyungtsütem achiba (shi takong & chiyungtsü shir achiba) ajanga temang nung timtem agütsüba metetdaktsütsüla, ta lai ashi.
Asenoki cancer awareness talila inyaktsüla aser District Hospital ajak nung detection facilities (Endoscopy, Colonoscopy, Colposcopy and Mammographngy) agütsütsüla, ta laisa shisem.
“Cancer agi shiranger nem counselling agütsütsüla, poor cancer patient fund ayutsüla, cancer agi shirangertem temang tajungba akümtsü atema teyari, jenjang ajemer common cancer drugs ayoktsüba, oncology nung specialists mapa inyakdaktsütsü, Radiotherapy facility tenzüktsü, Cancer Helpline, Cancer Society lapoktsü aser sorkari cancer ya ‘notifiable disease’ ka kümdaktsütsüla” ta Dr Khamo-isa metetdaktsü.
Laisa NHAK nung Cancer Care Facility indang service aliba osang metetdaktsü.
Iba nung endoscopy, surgery, histopathology, MRI, USG, oncology OPD, Oncology ward – day care facility (Chemotherapy), Palliative Care, NCD clinic, tobacco cessation clinic aser ICU dena lir. Külen mammography aser CT scan services lapoktsü atema tang teinyakdak lir, ta laisa shisem.
Iba sentong nung Palliative Care in-charge, NHAK Dr. Lalkrawsthangi Khalo-i palliative care indang osang metetdaktsü aser Miss Phek 2019 Shefüvi Pfithu-i la cancer nungi taneptsü anguba osang lemsatep.