JLF-i kidanger state tem dang yariteptsü mepishir

Dimapur, November 13 (TYO): Bodbarnü Naga yimten tebilemtsü atema Joint Legislators Forum (JLF) senden ka amen.
Tanü senden nung JLF-i kidanger state tem nung alirtem dang akokba tashi yimjung maparen takok ngua tembangtsü aser yimjung bener arutsü atema yariteptsü mepishi.
Asenok tiptema yimjung nung alitsü atema kidanger state temi temulung alemtsüla, ta JLF-i sangdong ka nung metetdaktsü.
Parnokisa Working Committee, Naga National Political Groups aser NSCN-IM dang Naga nunger ajak ajungtsü atema mangatettep alibatem amadoktsü aser külemi olemtep sabang nung adentsü atema mepishi.
Tanüngba Naga yimten teloktemia yimjung maparen nung shilem agitsü mepishir, ta JLF-isa ashi.
India sorkar aser Naga yimten teloktem tsüngda olemtep takok ngua tembangba pelashishia agizüker aser olemtepertemi bendanga agütsüba aser tensa angateta jembishinüba atema pelar, ta parnokisa metetdaktsü.
JLF-i maneni teyariteper ka ama yariteptsü aser akokba tashi nübortemi agizütettsüsa yimten ken o latettsü atema yaritsü, ta parnokisa ashi.
India Prime Minister Narendra Modi, Union Home Minister Amit Shah aser Nagaland Governor & Centre atema Interlocutor R.N. Ravi nungertemi olemtep ya tashi anir aruba tema tenüngsang agütsür. Maneni, lokti tentetba balala, kin hohotem, arogotem, NGO tem aser civil society temi olemtep len anir aruba pelashishia agizüker, ta JLF-isa metetdaktsü.