Maharashtra CM ji Shiv Sena nungi asütsü: Nawab Malik

Mumbai, November 15 (Agencies): Maharashtra nung Shiv Sena, NCP aser Congress lokteper sorkar kümra iba teloktep sorkar nung Chief Minister ji Shiv Sena nungi asütsü, ta NCP otongdar tongti, Nawab Malik-i metetdaktsü.
Tang Shiv Sena-i NCP aser Congress na den common minimum programme (CMP) renemdar, CMP ji ajanga party asem sorkar len anitsü.
Malik-i, “Chief minister ji Shiv Sena nungi asütsü, kechiyong Chief Minister onük nung Sena-i ‘Mahayuti’ teloktep toktsü,” ta metetdaktsü.
Party asemi sorkar akümtsü aser party asem tsüngda portfolios lemsatsü atema jembidar, ta osang angazüker.
Tanep NCP tongti, Sharad Pawar-i, state nung Shiv Sena-NCP-Congress sorkar akümtsü aser kümsük küm pongu abensatsü, ta metetdaktsü.
Yashi Congress-NCP, Shiv Sena-i onük 40 nung ajemdaker common minimum programme (CMP) draft renemogo, aser ibaji party asemprongla nungi tongtitemi agizükra November 19 tashi nungbo final draft renemtsü.
CMP draft nungji party asem tsüngda portfolio lemsatsü atema shia lir; kong Sena-i cabinet menden 16, NCP-i menden 14 aser Congress 12-i menden 12 angutsü ta osang angazüker. Assembly Speaker ji Congress nungi, deputy Speaker ji Sena nungi, legislative council chairman mendenji NCP nungi aser deputy ji Sena nungi asütsü ta osang angazüker.
Chief Minister menden atemabo telemtetba magi, iba dak sendakba nung Congress lenir kati, “Shiv Sena-i Chief Minister menden meshir. CM ji küm pongu abensa inyaktsü asü party ana lemsar inyaktsü, mesüra Congress, Shiv Sena aser NCP prong lemsar inyaktsüar mejangja,” ta metetdaktsü.
State Assembly election nung BJP aser Shiv Sena nati lokteper toktepa takok angu, ajisüaka Shiv Sena-i Chief Minister ji party ana lemsar inyaktsü akhang, saka BJP-i iba takhangba magizükba agi Sena-i BJP den teloktep toktsüba sülen sorkar akümtsü atema NCP-Congress teloktep dang nungi teyari meshi.