“Assamese online” ta ser Facebook page anema ken o benok

Guwahati, November 15 (Agencies): Supreme Court-i Ayodhya ken o atema oshidang agütsüba sülen “Assamese online” ta ser Facebook page ka nung ashishitep aketba onük ka lemsatepba atema Assam police-i ken o ka benokogo.
Iba onük adokba sülen police-i Facebook page indang administrator dang page agientsü tuyu aser administrator indang temetettsü asüngdangogo.
‘Assamese online’ ta ser Facebook nung public group ka anema ken o benokogo. Iba page admin ya ano mejangja aser iba atema onoki Facebook dangi shidi züluogo, ta police ketdangser kati ashi.
Ayodhya oshidang agütsüba sülen Assam police-i lokti nung mangatettep adoktsüsa onüktem lemsatepba noktangtsü atema social media site tem mita repranga arur. Tang tashi nung parnoki ashishitep aketba onüktem lemsatepba atema Facebook nung profile 15 tashi jangjaogo.
Iba ama page 15 tashi ajitetogo aser police-i admin kar dang post agientsü atema tetuyuba agütsüba ama parnoki agienogo. Post karbo taila profile amshia agütsüba lir. Facebook page 15 nungi asemji Guwahati nungi aser tanüngbaji tanga district tem nungi lir. Item page atema police-i cyber-dome amshiogo, ta police ketdangserisa metetdaktsü.