Nagaland Governor-i National Press Day salem abener

Dimapur, November 15 (TYO): November 16 nü Press Council of India (PCI)-i National Press Day ayonga amongba osang angashia kanga pelar aser iba anogo nung ni linük nung aser talisa Nagaland nung aliba media nisungtem den tepela salem abener, ta Governor R.N Ravi-i metetdaktsü.
“Taküm National Press Day nung PCI-i “Reporting – Interpretation: A Journey” onük jembitsü shimogo aser iba ajanga osang prokshiba jenjang tajungba akümtsü imlar,” ta RN Ravi-isa ashi.
Press ya democracy indang tamendakdak lung lir aser sorkar o sensotem tsüngda tesentaktep nung tongti shilem agir. Iba anogo amongba ajanga media züngsem shiai khuret tali angatettsü aser pei teinyaktsü nung shilem tajungba agitsü amanger, ta paisa metetdaktsü.