Justice Bobde-i 47buba Chief Justice atema tenangzükba agi

New Delhi, November 18 (Agencies): November 18, 2019 nü Rashtrapati Bhaven, New Delhi nung Justice, Sharad Arvind Bobde-i linük nung 47buba Chief Justice of India (CJI) inyaktsü atema tenangzükba agiogo.
Linük Tir, Ram Nath Kovind-i ketdangsüa Bobde nem tenangzükba agidaktsü.
Justice Bodde-i kanga tongtibang ken o aika nung obendang agütsüogo, aser tawa Ayodhya mangatettep ken o nung obendang agütsüba Supreme Court Constitution bench nunga pa densema liasü.
Arishi küm 63, Bobde-i Justice Ranjan Gogoi melenzüker aser pai ita 17 shi CJI inyakba sülen 2021 küm April 23 nü CJI menden nungi anisüngzüktsü.
Pa ya Maharashtra nungi lawyer aika adokba kibong ka nungi lir aser kanga nüngtugu senior advocate Arvind Shriniwas Bobde’er jabaso lir.
Justice Bobde ya seniority apir CJI shim aser pa CJI shimtsü atema taoba CJI, Gogoi-ia shidi ka ajanga Centre nem metetdaktsür liasü.
Linük nung aliba court aika nung judge mapa tazüng aliba jenti dak sendakba nung osangbenertemi asüngdangba langzüdang Bobde-i, nüngdakba maparen inyaktsü atema state high courts ajak nem tetuyuba agütsür, ta metetdaktsü.
Justice Bobde ya 2002 küm March 29 nü Bombay High Court nung Additional Judge shim, 2012 küm October 16 nü Madhya Pradesh High Court nung Chief Justice shim aser 2013 küm April 12 nü Supreme Court nung judge shima liasü.