Northeast ajungalen CAB anema lungkak aiter

Shillong, November 18 (Agencies): Centre-i Citizenship Amendment Bill (CAB) benoktsü atema mapa inyakdang North East Forum for Indigenous People (NEFIP)-i Hombar nungi iba bill anema lokti lungkak aitba sentong agitsü tenzükogo.
Iba atema Meghalaya nung Hombar aser Mongulbar aonung mokdangtsü ayongzükogo.
NEFIP indang executive committee-i state shia federating unit -i pei pei mulungba ama Hombar aser Mongulbar anogotem lungkak aittsü tetuyuba agütsü.
“Confederation of Meghalaya Social Organisations (CoMSO)-i November 18 aser 19 aonung lenmang mokdangtsü” ta osang ajanga ashi.
Tanü NESO-ia Citizenship Amendment Bill (CAB) anema lungkak aitdang Manipur kübok tesem kar nung tena mejungi aküm.
North East Students’ Organisation (NESO)-i Deobarnü sangdong ka nung “Hombarnü Northeast state yimtiba 8 nung CAB anema lungkak aitba sentongtem agitsü” ta metetdaktsü.
Manipur nung Manipur People Against Citizenship (Amendment) Bill (MANPAC)-i tanü ghonda 18 mokdangtsü ayongzük.
Osang angazükba agi, Imphal kübok Keishampat Wahengbam Leikai road dena tesem aika nung lungkak aitertemi police den raratep.
“Onoki tatem tashi CAB anema noktaktsü. CAB ajanga Northeast nung lisopurtem samatsütsü” ta lungkak aiter kati ashi.
“Northeast ya ozüng alema arurtem anidenba tesem ka masü” ta paisa ashi.
North East Students’ Organization (NESO) kübok Tripura Students’ Federation (TSF)-i tanü Tripura Tribal Areas Autonomous District Council (TTAADC) indang headquarter Khumulwng nung CAB anema lungkak aitba sentong ka agi.
NESO nung züngsema aliba teloktemji- , KSU, AAPSU, AASU, AMSU, NSF, MZP, TSF lir.
TSF-i Tripura Governor Ramesh Bais dangi shidi ka züluba nung “North East Region ajungalen taoba East Pakistan aser tang Bangladesh ta ajaba linük nungi aruba bendangertemi sünga lir. Yimsüsürtemi item nisungtem pusemer aser northeast nung lisopurtem maitsü asoshi lendong bentsür arur. Tenokdangba kecha melii bendangertem arudaktsüba ajanga northeast state tem timtemer” ta shia lir.
“1971 küm Bangladesh indang liberation war mapang Hindu refugee aika North East kübok state temi anioka lir. Tang Citizen (Amendment) Bill ajanga 1971 sülen aruba Hindu Bangladeshi nungertem India senso kümdaktsütsü meranger. North East ya ozüng alema aruba Bangladeshi nunger anidendak masü” ta TSF-isa metetdaktsü.
Onoki iba Bill magizüker aser tanaben bener marutsüla ta akhanger. Northeast ajungalen Inner Line Permit System inyakyim tenzüktsüla aser state shia Base Year lateter National Register of Citizens (NRC) yanglutsüla, ta parnokisa ashi.