Democracy nung Rajya Sabha ya tongtibang: PM Modi

New Delhi, November 18 (Agencies): Taoba mapangtem nung Parliament nung rongrong kanga adokba ajanga tongtibang bill agi magizüktetba dak sendakba nung Ato kilonser, Narendra Modi-i, democracy nung asadangtsü atema Parliament nung Upper House ji (Rajya Sabha) tongtibang, ajisüaka asadangba o tetsüdaktsü agütsüba na bendangtettsüla, ta ashi.
Rajya Sabha session 250buba nung jembidang pai Sharad Pawar-i aniba NCP aser Biju Janata Dal nati parnok tebilemba onüktem benokdang kodanga sabangleni maru, ajisüaka parnoki lemsatepnüba jangja-jangja ashi, ta tenüngsang agütsü.
“Rajya Sabha ya asadangba aser liromedemtsüba sabang ka lir. Iba ya democracy atema nüngdak. O tokteptsüla ajisüaka asadangba o tetsükdaktsü agütsüba na bendangtettsüla,”
Modi-i taoba mapang Ato kilonser, Atal Bihari Vajpayee-i jembiba o lepshia, “Upper House ji tanabuba house asütsüa akok, saka iba ya jenjang ilaa mezüngshitsüla,” ta ashi. “Tanü ni Atal-i jembiba o lepshia metetdaktsür- linük terenlok atema Rajya Sabha ya nungitba house ka südaktsütsüla,” ta paisa ashi.
“Tanü ni party ana – NCP aser BJD dang pelaba shisemer. Item party-i Parliamentary telatetba nung aliba ama inyaker. Parnoki kodanga longkak aita sabangleni maru. Ajisüaka parnok tebilemba onük jangja-jangja ashi. Item nungjagi asenoki tangazüktsü aika lir,” ta pai ashi.
“Linük nung tajung ka atalokdang Rajya Sabha-i shilem tajung agiogo. Yangi (Rajya Sabha) Triple Talaq atema Bill magizüktettsü ta bilema liasü saka agizüktet. GST-a Rajya Sabha nung agizükba ajanga mapa küma benokogo,” ta pai ashi.
Paisa, yimtenren nung madenertem nem linük terenlok nung shilem agidaktsütsü atema Rajya Sabha ajanga maongka agütsür, ta ashi.