Dr.C.Tarep Ao alima nungi pilaogo

Dimapur, Nov. 18 (TYO) : Mopungchuket nunger Satribari Christian Hospital, Guwahati nung 1965 küm mezüng Medical Superintendent inyaksang, Dr.C.Tarep Ao tanü November 18 anepdang alima nungi pilaogo. Pa arishi küm 90 liasü.
Pa ya Scottish Church College, Calcutta nung Intermediate College zünger 1960 küm Assam Medical College, Dibrugarh nung medical degree ngua renem.
Pa Satribari Christian Hospital nung inyakba sülen 1967 küm Nagaland government mapai ai aser 1988 küm Mokokchung Civil Hospital nung Civil Surgeon inyaka lia kümsük küm agi tonger mapa nungi anen. Pa mapa nungi anener külena manemshilurtem yaritsü asoshi Dimapur nung Oriental Nursing Home lapoka nüngdakba purtem yaria liasü, Pa kenpiga temang mejungi lia arur tanü alimai nungi pilar.
Pa den asüpila sentep sentong Dimapur nung Dimapur Ao Baptist Arogo kübok Town Fellowship (Kher Mahal) tenla kidang Novemner 19 anepdang 10:00 ako nung alitsü.