Tantsür tambur meimtsüla

Alima nung nisung ajaki aginüba temoatsü kaji arshi talang linür saka ano tantsür tamburbo mekümner. Ibaji kodang bilemdangdir asenokia menünüa bilemer aser meimchir dak iba ama shisatsüji ngua Teyanglur Tsüngrema kanga menünüa bilema alitsü südi. Atangji, arishibo talangka alitsü saka tantsür tamburbo kodanga makümtsü ta inyaktsübaji Tsüngrem asoshi kecha tasak masü, ajisüaka tangbo kotak lima matong tashi iba maongkaji asenoki alima nung yabo magitettsü. Asenoki aiben tantsür tambur küma arishia aliba ya peii mulungba agi akümer amai bilemer, ibayongji aikati Tsüngrem temoatsüa ta mezüngshir aser tantsür tamburtemji pei tsürabur ser nung meima anepalua masür. Nisung ka arshiji Tsüngrem ket nung dang lir. Pai nisung kar nem arishi talang aser kar nem tatsü ta agütsür. Aji oda, alima nung ya asenoki tantsür tambur küma arshia linüba agi alitsüba masü saka Tsüngrem mulung, anungji asenok mapajibo alima nung kobapiga lidir liaka nisung ajak asoshi teyari angudak taküm ka asütsüsa Tsüngrem mulungba nung alitsübaji dang tongtibang lir. Atangji, alima nung asenok arshia alitsü atema Laishiba nung teinyaktsü kar agüja lir. Item rongnungji tsüraburtem dang tashi angatsü, temeim mapa inyaktsü aser Tsüngremi agütsüba ozüngtem benshitsübaji alima nung nisungtem arshia linürtem asoshi Tsüngremi latettsüba teinyaktsütem asütsü. Item kulitem jagi tantsür tambur küma arshia alibaji angati anguba maongka masü saka Tsüngrem peladaktsüba purtem südi ta angatetter. Nisung taküm ya William Shakespeare-i ashiba ama, tenetbenren ina atudang, kinü nungi tain akümer aser kanga tantsür tambur akümdangbo ano tanaben kinü amai kümadoker. Aji oda, tsüraburtem o parnok chinurtem na ya küm ishika kati ka yaritepa alitsü asoshi Tsüngremi sentong yanglutsüba nung alir amai bilemtsüla. Ibayongji, tsüraburtemi pei chinurtem kinü asüdang mama yongdakja aser chi mejaker (tanü asüngbo memejaker) nemja anepalu tenzükba nungi teka nung amer kaketrejui yoka tashitemteter kümdaktsür aser kibong küma peisasa mapa inyakba melitet tashi anepalur. Iba amaji pei chirnurtem anepludang memetetika tsüraburtemji tantsür tambur kümadoker aser chirnurtemiang chiyongtsü renema chidaktsütsüsa aser anir jajatsüsa kümadoker. Chirnurtemi iba ama tsüraburtem tantsür tambur akümba mapangji parnoki anepalua intetdaktsüba temeim aser teyari meyipa agütsütsüsa Tsüngremi mapang tajung ka agütsür ta angatettsüla. Joko, tantsür tambur akümer asünungji tebu mali akümtsü, tenük tenarong anüa akümtsü, peisasa sadema mejajatettsü. Ashiko, karbo peisasa mesakteti akümtsüa akok. Iba mapangji asenok kinü tanur asüdang yipten nung asenoka asenoksasa msesakteti jepa alidang parnokiang asenok mesoa anepalur asütsü ta nükla dangi arua asenoki parnokji anepalutsüla. Asenok aikati pei tsüraburtemi asenok anepaluba temeim amadoker aser parnokjibo pei chinur aser kinungertema shinga mali ama sendoka toktsür. Ajisüaka, asenoki rajemtsüba tongtibang kaji, tanü asenoki asen tsüraburtem komaka anepalua asen chirnurtem dang sayur patetkaji asen chirnurtemia asenok tantsür tambur akümdang anepalutsü. Kibong aika nung kinungboi mesüra kinungtsüi pei tsürabur meimba dak alaka pei tenütekubo memeimer, iba jagi pei kibong sünepa maliba dang masü saka tsüraburtem mulung kuremdaktsür. Asenoki anepalunüyonga aser meimnüyonga arshia alir tsüraburtem ya talangkabosa malitsü, anungji anogo shia tanü pilatsü ama bilema tanurtemi pei tsüraburtem kanga meima anepalutsüla. Taküm alidangbo memeim ser süadoker sasaseta ajepbaji kanga tamashi mapa asütsü. Asenok meimtepa alitsüba ya mapang tatsüka dang, anungji asenok meputepi alitsübabo mapang mali ta bilema, akok tashi anogo shia tsüraburtem peladakja akümkettsütsübaji  chirnurtem mapa asütsüla.