NEPEx dak sendakba nung senden amen

Dimapur, Yimpoksüi/November 20 (TYO): Menoknok aser anentsü lendong asoshi renemshia alitsü atema November 21 nü Nagaland nung mock drill agitsü aliba dak sendakba nung November 19 nü Longleng, Deputy Commissioner, M. Shayung Phom lenisüba kübok DC conference hall nung table-top exercise agiogo.
Senden nung DC-i, table talk exercise aser mega Mock Dill nung madenba department tem ketdangsertem nem metetdaktsütsü ta amokmerenogo aser pai departments ajak dang NEPEx nung tamakok maludaktsüi aru adentsü tuyuogo.
EAC Headquarter Robi Sangtam-i, overall Incident Response System indang aser incident response team shilem indang metetdaktsü kong department ajak densema lir. Paisa, taoba mapang mock drill takok ngua agiba indang bilemtetshia jembiba den sorkar ketdangsertemi shilem agiba ajanga taküm iba sentong tajungba agitettsü imlaba lemsatep. Robi-isa, NEPEx nükjidong tulutibaji, lendong atalokba mapang jenjang shidak agitsü asoshi nüburtem nem metetdaktsütsü atema lir, ta ashi. NEPEx nükjidongji state renema lidaktsütsü asoshi lir, kechiyong Nagaland ya natural calamities balala agi kongshitsü ana nung aliba state ka lir.
Senden nungsa SP Longleng, ‘F’ Company Commander 44th AR, Longleng aser ADC Longleng nungeri taoba mapang tajangshiba tem indang jembi. Maneni senden nung Nagaland State Disaster Management Authority (NSDMA) indang Booklets züngsemtem nem lemja liasü, ta DPRO Longleng sangdong ka ajanga metetdaktsü.