Tuensang nung Nov 19 nü süngkong ka amenok

Tuensang nung November 19, 2019 nü süngkong atsüba mapang tangokba noksa nung angur.

Dimapur, Yimpoksüi/November 20 (TYO): Tuensang district DB’s Customary Court-i November 20 nü süngkong ka amenokogo. “Reviving the Glory of Drum” omen nung ajemdaker iba sentong agia liasü. Süngkong ya Waoshu yimtsüngi tenla agütsü aser süngkong atsüba sentong DC Bungalaw nungi tenzük aser Customary court Tuensang nung tembang. Sentong nung akalteta jaokerji DC Tuensang, Mohammed Ali Shihab asü aser süngkong tenüng ya Anong jatsüogo. Süngkong atsüba sentong nung Waoshu yimdaklirtem, jila nung yimtsüyimputem, DBs aser district nung ketdangsertem dena liasü.
Süngkong amenokba sentong ya Customary Court Hall Tuensang nung EAC Tuensang Kevithito Rose lenisüba kübok agi aser PA to DC Tuensang aser Convenor Planning committee Yangchu Chang-i okila jembia liasü.
Sentong nung o jembidang Shihab-i nüburtem longjemer inyakba atema tenüngsang agütsüba den district nem süngkong ka tenla agütsüba atema Waoshu yimtsüng dang pelaba metetdaktsü. “Iba ya district meyong lir aser iba kübok district yimjiyimjung aser tesunep nung alitsüla. Iba ya sung agi yangluba asem ka dang masü saka telongjem, bendanga agütsüba aser tasütait temaitsü lir. Iba ajanga tetsü tebutemi lokti tentet yangertsü atema parnok taküm bendanga agütsüba sobaliba sayur. Iba ya asen sobaliba nung tongtibang shilem ka lir aser yimtsüng rongsen temaitsü lir. Tanü asüngtendak nung iba ya asen maitsü tamaitsü ka lir aser iba asoshi asenoki nemadanga bilemtsüla,” ta DC-i ashi.
Sentong nung Rajashikaran, DIG-ia nüburtem den yimjiyimjung aser tepela osang lemsatep. T. Oungbou, DB aser par medemertemi sobaliba ken ka aten aser S. Namang, Hd. GB Waoshu village aser Heno, Rtd PA to DC nungeria o tatsütsü jembi. Maneni sentong nung M. Chingmak, Spl.Grd DB Tuensang-i tepela anküpo jembia liasü, ta ketdangser sangdong ajanga metetdaktsü.