AAA team-i Fazl Ali College semdang

Mokokchung, Yimpoksüi/Nov. 20 (TYO): November 19-20 anogotem nung Academic aser Administrative Audit AAA team züngsemtemi Fazl Ali College, Mokokchung semdanga liasü, ta tanü FAC media cell sangdong ka ajanga metetdaktsü.
Dr Watijungshi (Convenor) Addl Director (Retd) Higher Education,Kohima: Nagaland leniba nung AAA team züngsemtemji Dr R.K Behera Associate Professor Philosophy Dept, Patkai Christian College (Autonomous) Dimapur aser Dr Vitsosie Vupru IQAC Coordinator Dimapur College, Dimapur nunger liasü.
Parnoki section ajak semdangba den departments balala, administrative offices, kaketnang aser college campus nung aliba tetsür aser tebur hostel ajak sema senzüba sülen College Principal, IQAC Coordinator, HOD’s, kaketshirtem, tesayurtem aser staff tem jurila ajurua shisa lemsatepa liasü.
AAA team züngsemtemi reprangtetbatem nung ajemdaker temelenshitsü atema tebilemba lemsatep aser tesayurtem, kaketshirtem aser staff tem dang shisaliok tajung angutsü atema kanga meranga inyaktsü ajungshi.
Iba sentong tembanga Dr Lanurenla IQAC Coordinator leniba nung senden ka amen aser FAC Principal, Allong Tzudir-i tepela anküp o jembia liasü.