Mokokchung nung restaurant tasen ka lapokogo

Mokokchung, November 20, 2019 (TYO): Mokokchung nüburtem atema tepelatsü osang tajung kaji Nov 20 nü Mokokchung town kübok Arkong Ward nung aliba Popular Bakery azük nungto “The Restaurant 2” ta sür restaurant tasen ka lapokogo. Iba restaurant-ji Eden Kichu aser Lechen nadi lapokba lir. Iba restaurant tasenba nung ya Tandoor, South East Asian, Chinese aser nüburtemi sabuba chiyungtsü tapu balala angutsü.
Naga nunger dak chiyungi aoba yimya ya kangabo mali, anungji, kibong ajak chiyungi aoba (dinning out) restaurant ka südaktsütsü aser chiyungi aoba yimya benshidaktsütsü nükjidong nung iba ya lapokogo, ta kibur Lecheni osangbenertem den jembidang lemsatep.
Iba restaurant nung ya Honibar shia chiyungtsü balaka (Saturday Special) anganütsü tebilemba lir, aser chiyungtsü tapu balala den tajemtsü juice, coffee aser mocktail amala densema amshitsü, ta laisa ashi.
Iba restaurant nung tamentsü mendenji kanga junger, sadoksadoka kazütettsüsa tesem tajung ka lir, metsümeshidak lir, gari anendak (parking)-jia kanga temesübo masü, iba restaurant ya anepdang 10:00 nungi aonung 8:00 ako tashi lapoktsü. Anungji, tejangrartemi pei kibong, medemertem aser temeimertem anir oa kidang bulua manguba chiyungtsü tasentemji chidangtsü akok.