Tottenham Manager asütsü Jose Mourinho shim

London, Yimpoksüi/November 20 (Agencies): 2022-23 season tatem tashi inyaktsü atema Tottenham Hotspur puri Jose Mourinho manager tasenba asütsü shimogo, ta Premier League club yagi Bodhbarnü metetdaktsü.
Manchester United puri December ita pa mapa nungi anentsüba sülen arishi küm 56 tain Portugal nunger manager ya kecha club dena sendaka maliasü aser tang pai Mauricio Pochettino melentsü, shiba Mongolbarnü mapa nungi anentsü.
“Football asaya nung takok tajungtiba ngur aliba manager ka onok den denogo. Pa tajangshiba aika bena aliba nisung ka lir aser pai team ajungmesotettsü aser pa tactician tajung ka lir. Pai coach asüba club ajak den pai takok ngutetogo. Pai tashi balaka bener arutsü ta onoki amanger,” ta Spurs mendenbuba Daniel Levy-i ashi.
Spurs pur tang league nung jenjang 14buba nung lir aser parnok ya Mourinho kübok inyaksangshiba Premier League club asembuba kümogo.
Pa shimba dak sendakba nung Jose-i ashiba agi, “Club kanga bendanga agüja pusemertem aliba aser puti otsü tajung aliba club ka den adentsü asoshi kanga yongyaa atar. Squad aser academy nung sempet tajung aketba asayartem aika aliba ngua ni kanga jangra ademer. Item asayartem yagi ni atsüa aru.”
December ita Manchester United puri mapang nung anentsüba sülen Mourinho club kecha nunga inyaka maliasü aser 2004 küm Porto toktsür Chelsea nung oa adenba sülen pa sen peria aliba club tem nung dang inyaka arudar. Anungji Tottenham nung pa shilem reprangtsü jangrademtsüka asütsü.
Ajsüaka England’s Premier League nung asaya 12 nung pezü dang kokteta jenjang 14buba dang tongtetba sülen Tottenham puri Mongolbarnü Argentina nunger coach Pochettino mapa nungi anentsüogo.
Taküm parnok League Cup nungi fourth-tier Colchester United puri tsükdaktsü aser Champions League nung Bayern Munich puri 7-2 agi akok.