Telungpurtemi sen meshia züka merenshiba aitsür: PAC, NCD

Dimapur, November 20 (TYO): Kohima district nung Khuzama Excise check gate anasa November 20 anepdang 9:45 ako meta NSCN(IM) züngsemtem ta temulung melemi bilemertemi truck driver ka dang sen meshia züka merenshiba aitsür ta PAC, NCD-i metetdaktsü.
Truck gariji Dimapur nungi Imphal-i aodang len tom nung telungpurtemji taxi ka nung mener arur sen meshi. Iba mapang truck driver-i parnok dang kibur den jembiang ta ashi saka tejashi nung telungpurtemi pa dak kanga mejungi azük aser pa ket nungi sen meyirjang 10 rakzüka bener ao ta osang angazüker.
Truck driver ji Mao nung anepalutsü atema anir ao ta police osang ka angazükogo, ta PAC, NCD-i ashi.
State nung yamai mapa tamajung inyakba ya khukhua aitsür. Tanü NSCN(IM) lennirtemi India sorkar den tematiba jenjang nung olemtepba mapang ka nung aser Naga nungeri telemtetba ka agitsü yongya alidang, iba ama mapa inyakba ya magizüker, ta parnokisa metetdaktsü.
Police-i iba mapa inyakertem aputsü aser ozüng tapet agi merenshitsü akhanger. Maneni, NSCN(IM)-i iba mapa inyakertem maitsü jangjatsü aser parnok ketdangser ket nung agütsütsü atema takhangba agütsür, ta PAC, NCD-isa ashi.