Nagaland mokdangba nung shilem agiba atema pelar: JCPI

Dimapur, November 20 (TYO): CAB, 2016 anema Northeast nungertem külemi ola adoktsü atema NEFIP-i ayongzükba nung Nagaland sensotemi yaritepba atema kanga pelar, ta Joint Committee for Prevention of Illegal Immigrants (JCPI)-i metetdaktsüogo.
CAB, 2016 anema Nagaland ajunga ghonda 18 mokdangba nung nübortemi pei mulungsentsü agi angateta shilem agiogo. Kanga dang mazüngi aliba mapang ka süaka district ajak nung iba mokdang takok ngua agitetba ajanga asenoki CAB magizüker ta ola tulu aser tejangja adokogo, ta JCPI-i ashi.
Iba sentong nung CSOs, kin hohotem, shishilembaren dak sendakba teloktemi yaritepba atema kanga pelar, ta parnokisa shisem.
North East ajungalen CAB anema lungkak aitba ajanga asenoki iba bill magizüker ta sayuogo. Iba bill ya Parliament nung ano mebenok lir aser asenoki ola adokba ajanga India sorkari northeast nung alirtem den asüngdangtepba sülen ang bill ji benoktsü amanger, ta JCPI-isa ashi.
India sorkari northeast nunger anema tashiyim agi mapa inyaktsü tekong merangba ya magizüker. Northeast ya ozüng alema arurtem bendendak tesem ka mekümdaktsütsüla aser iba ya asenok ajak indang tebilemtsü ka lir, ta JCPI-isa ashi.
India-i northeast nung lisopurtem dang nungibo bendangertem asoshi ang temulung agütsüba ya mangateter. Northeast nung lisopurtemi onok temetentem atema külemi longjemer raratsü lemtetogo aser onoki temeten mangu tashi inyaktsü, ta JCPI-isa metetdaktsü.