India ajungalen NRC yanglutsü: Amit Shah

New Delhi, November 20 (Agencies): Linük ajungalen Assam nung yangluba ama National Register of Citizens (NRC) yanglutsü ta Home minister Amit Shah-i tanü metetdaktsüogo.
Ajisüaka, iba mapa asoshi tamangba yimsü amanger shingaia shisabulua mebilemtsüla, ta pai ashi.
“NRC nung tamangba yimsü kar züngdoktsü ta onük kecha lateta mali. India nung senso ajak NRC list nung züluoktsü. NRC ya Citizenship Amendment Bill dang nungi balaka lir” ta Rajya Sabha nung Amit Shah-i metetdaktsü.
August 31 nü Assam indang NRC final list sayaba nung nisung million 1.9 shi ka züngdok.
Iba draft list nung madenba nisungtemi tribunal dangi aotsü temeten lir. Tribunal-i aotsü atema lawyer tem teyari magitetba nisungtem nem Assam sorkari senotsü teyari agütsütsü, ta Shah-i ashi.
BJP sorkar kümteta aliba state kar- Uttarakhand, Haryana, Uttar Pradesh, Jharkhand-i Assam nung ama NRC maparen inyaktsü ta sangoktsüogo.
Tanü West Bengal Chief Minister Mamata Banerjee-ibo lar state nung National Register of Citizens (NRC) meyangludaktsütsü ta akangakanga metetdaktsüogo.
Union home minister Amit Shah-i iba sangdong agütsüba sülen lai iba ya metetdaktsü.
“Shingaia Bengal nung senso magientettsü. Ozü sorkari tamangba yimsü nung ajemdaker nisungtem melemdangtsü” ta Murshidabad district kübok Sagardighi nung jembidang Mamata-i ashi.
“Bengal nung NRC yanglutsü ta shia nisung kari timtem adokdaktsütsü meranger. Ajisüaka, onoki Bengal nung NRC mapa meinyakdaktsütsü” ta laisa metetdaktsü.