Linük rongsenkettsüng atema PM-i mongintem den jembitsüla: Mamata

Murshidabad, November 21 (Agencies): Centre sorkari PSUs aika nung shares invest masütsü atema telemtetba anema Brihostibarnü Trinamool Congress tongti aser West Bengal chief minister, Mamata Banerjee-i, tang linük rongsnkettsüng jenjang mejungi aliba onük nung Ato kilonser, Narendra Modi-i mongintem aser yimtenren party ajak den jembitsüla, ta ashi.
Mamata Banerjee-isa, central public sector firms nung sorkar stakes ayokba ajanga mapang tatsüka dang anisüngzüktsü, ta ashi.
“Centre sorkari mapang tatsüka anisüngzüktsü atema masü saka teti atema lenmang bushitsüla. Rongsenkettsüng tashi itta melira item telemtetba ajanga kecha masütsü,” ta lai Murshidabad nung osangbenertem dang ashi.
“Nüburtemi shimba sorkar ka nem sademsadema mapa inyakdaktsütsüla, ajisüaka linük takoksa anguba onüktem nungbo sorkari tanga party ajak tebilemba-a angadangtsüla,” ta Trinamool Congress lenirisa ashi.
“Item ama tebilemtsü onük bentettsü atema Ato kilonseri linük nung mongintem den jembitsüla aser pary ajak senden ayongzüka tebilemba lemsateptsüla, ta nibo bilemer,” ta Mamata-isa shisem.
Bodhbarnü Union Cabinet-i blue-chip oil firm BPCL nung sorkar stakes ayoktsü, shipping firm Shipping Corporation of India aser cargo mover Concor nung stakes ayoktsü atema lemtetogo.