GPRN-i jangjashitsür

Dimapur, November 22 (TYO): Dimapur nungi Imphal-i aoba truck gari driver ka NSCN züngsemtemi züka merenshiba aser Rs. 15,000 tax meshi ta PAC, NCD-i tai tongloktsüba atema National Socialist Council of Nagalim (NSCN)-i jangjashitsüogo.
“Onoki iba onük magizüker aser aitsür. Maneni, PAC-i pei teinyaktsü nungi tali awaloka oa meinyaktsü ashir, kechiyong NSCN-i yearly vehicle tax agibaji Naga yimten maparen manendaktsüi aotsü atema lir” ta MIP sangdong ka nung metetdaktsü.
Iba anogo ozü züngsemtemi truck driver tem dang yearly vehicle tax agütsüba indang osang metetpelaa lia, truck driver kati kanga menudaktsü. Iba jagi ozü züngsem kar pa dangi orr tapubang nung ameter jembi, saka idangji pa aoksa aser pa dak mekongshidaktsütsü atema meyipdang truck gari nung pa tekolak atsük. Pa ket nungi sen kecha magi mesüra teka mesangshi, ta MIP-isa ashi.
Onoki truck driver tem dang nungi angazükba agi Madam Sema (Khehuli Kibami) ta ser nisung kati KK Agency, Lahorijan, Assam tenüng amer truck shia dang nungi Rs. 4000, 10,000 aser 20,000 tashiyim agi meshia agir. Iba tetsür yagi mobile phone number 9436017561, 7005620675 aser 7005620655 amshia NSCN züngsemtem amokmerener aser parnok aputsü atema Indian security forces yoktsü ta ashir. Iba ajanga India sepaitemi NSCN züngsem aika puogo, saka iba ajanga Khehuli Kibami aser Indian security forces yaritepa, KK Agency, Lahorijan, Asssam tenüng amer tashiyim agi sen meshia agiba jungkai adoka sayur, ta MIP-isa sangdong nung shia lir.
Iba onük atema tetsürla maitsü jangjatsü nüngdaka kümogo aser KK Agency tenüng amer sen meshiba kuli metettsüla. Iba dak sendakba nung PAC-i kanga dang kümdanga inyaktsüla aser tashiyim agi sen saruba aser tax tsüngda tebendang angatettsüla. PAC-i teratatsü onük benoker Naga yimten maparen inyakba tenüng meraksatsütsüla, ta MIP-isa ashi.