Nüburtem nungi teyaritep aser amalitep akanger: Limawabang Jamir NCS

Mokokchung, November 22 (TYO): Pei district-i arubaji nüburtemia tuluka imlar aser yamaji khureta tali abentsüsa akümer. District nung pei nisung ‘Deputy Commissioner’ inyakba tajangzükji nüburtemi kecha marendaki maparen aser khuret ajak otia lemsatepteter, ta iba osangbeneri tawa aruba Mokokchung Deputy Commissioner, Limawabang Jamir NCS den pa taktang nung sensaksemdang pai lemsatep.
Iba osangbeneri ‘na yangi Deputy Commissioner ka ama inyakdang nai kechi nungsa temulung agüja inyaktsü? ta metetnüa asüngdangdang, “Tang mapa den repsema talisa Govt. School-tem nung tesayur temelen yokba (proxy teacher)-ji sashisashia reprangtsü aser iba dak sentakba nung yaktatiba nung concerned department nung ketdangsürtem ajuruteptsü lir”, ta pai ashi.
Iba den külemi anema aliba tsütsü (health sector), merükmejuba tsütsü, aser lanurtem mapa balala nung küm piyong mazüngi inyakdaktsütsü atema maparen kar inyaktsü merangtsü aser iba dak sentakba nung Mokokchung District Art & Culture Council (MDACC) dang asalentong kar renemtsü tebilemba shidanga lir, ta paisa ashi.
Assam den artsü tebilemtsü (border issue) dak sentakba nung onük kar asüngdangdang, “yakta asen den kidanger süa aliba Jorhat aser Sibsagar semdanga külem bangtak yimsüsürtem ajurutepa yimjung maparen kar inyaktsü tebilemba lir”, ta ashi. “Artsü tebilemtsü ajanga aiben state anaprongla nung timtem ajurur, anungji, kidanger Assam den tesentaktep tajung ayutsübaji kanga tongtibang aser iba atema tim mera kar agitsü merangtsü”, ta paisa shisem.
Tang ya Naga nunger solution atema inyaktepba mapang ka asünung, civil societies-tem; “Ao Sendeni anir Watsü Mungdang, Ao Kaketshir Mungdang, yimdak putu menden aser telok ajaki temulungjang taroktiba agi district nung yimjung aser tesünep atema nungita yaridaktsünür”, ta paisa inyakdaktsünüba o ka ashi.
Merükmejuba tsütsü kar asüngdangdang, Nagaland nung Mokokchung district ya temerüktiba ta züngshir aser ibaji jangratemtsüka lir, aji saka, merükmejuba dak sentakba nung ano teinyaktsü wadang aika angur, anungji, “item mapatemji takok ngua aotsü atema nüburtem nungi teyaritep aser amalitep nungdaker”, ta paisa ashi.
Mokokchung nung tzü agi anüngbaji tanü tasen masü, anungji, iba dak sentakba nung PHED ketdangsür dena ajurutepa menogo. Mokokchung town nung tzü atsübaji source tongtibang asem lir, saka tangji source ana raksaa lir. Anungji, raksar alibatemji tekaratiba nung yanglutsü asoshi tim mera agitsü, ta paisa ashi.
Nüburtem dang teshinüba kar ali asü? ta asüngdangdang, “nübur nungi teyaritep aser amalitep akanger”, ta ashi. “Ni külem administrative officer-tem danga nüburtem den junga jembishinütsü ashitsü aser nübur timtem junga angatsü aser reprangtsü asoshi ajungshitsü, anungji, timtem kar danga lira marendaki arua ashitsüla aser onokia akokba tashi yaritsü”, ta paisa metetdaktsü.
Arishi küm 48 tain Limawabang Jamir ya Ungma nunger Wb. Lipokmeren Jamir aser asür Wt. Jemtimenla na jabaso lir. Pa Delhi University nungi M.A (Political Science) renem aser 1996 küm EAC aküm. Pa kinungtsü Canaany aser tena nem jabaso ana (2) aser jala ka (1) moaja lir.
Pa EAC kümer külen mezüng posting-ji Pfutsero nung liasü, iba sülen khezhakeno, Chumukedima, Dimapur aser Kohima nung lir külen, promotion nung SDO (C) Phomching liasü, aji sür, Under Secretary SCERT, SDO (C) Mokokchung, SDO (C) Kohima, SDO (C) Ralan, Under Secretary Municipal Affairs, Deputy Secretary Municipal Affairs, ADC Atoizu, ADC Mangkolemba, Director Nagaland State Rotaries aser Jt. Secretary Youth Resource inyaka lia tang Mokokchung-i D.C aruba lir. Küm 10 shi lir külen Mokokchungi Aor chanu ka D.C aruogo.