NPF-i NSCN(IM) aser NNPGs longjemtsü ayongzüker; Dr Shurhozelie aser K G Kenye na tanaben shimshi

Kohima, November 22 (TYO): Naga yimten asoshi telemtetba ka agitsü atema NSCN (IM) aser NNPGs indang working committee longjemtsü mepishir, ta opposition Naga People’s Front (NPF)-i metetdaktsü.
Hokolbarnü Naga Solidarity Park nung NPF indang general convention alidang bangzüng renemba nung iba temepishiba onük dena lir.
Iba mungdang nung NPF president Dr Shurhozelie Liezietsu aser Opposition Leader T R Zeliang nati anir Manipur o Arunachal Pradesh nungi NPF units nugi züngsemtem aden.
Prime Minister Narendra Modi, Centre atema interlocutor & Governor, R. N. Ravi aser Naga olemtepertemi Naga yimten asoshi telemtetba ka agitsü atema angateta mapa inyakba atema tenüngsang agütsür, ta NPF-isa metetdaktsü.
Parnokisa kidanger state tem dang Naga yimten tebilemtsü koktettsü atema akokba tashi yariteptsü mepishia metetdaktsü.
Tanüng mungdang nung adenertemi NPF election board nem tenüngsang agütsü aser kümsük 2020-2024 atema Tir Dr. Shurhozelie Liezietsu lenisüba kübok ketdangpurtem pusema nungittsü telemtetba agi.
Parnokisa Tir Dr. Shurhozelie aser leader of NPF Legislature Wing T. R. Zeliang na lenisüba sülen anidaktsü ta bangzüngtep.
“Naga Yimten Teloktem aser India sorkari Indo-Naga yimten tebilemtsü angatetteptsü atema mapa ngua kanga pelar” ta Opposition lennir aser taoba Chief Minister T R Zeliang-i ashi.
NPF Party-i teyariteper ka ama dang masü saka Naga yimten tekaraba nung latettsü tema India sorkar den jembiyonga arur aser iba tangatetba nung noktaka lir, ta pai ashi.
DAN-III sorkar mapang NPF Party-i mapa inyakbaji Naga putiotsü nung teti atema züluoktsü. NPF-i meranga inyakba ajanga 2015 küm Framework Agreement agitet aser October 31, 2019 nü India sorkar aser Naga olemtepertem (NSCN(IM) & NNPGs) angatettep, ta T.R Zeliang-isa ashi.
“Tanü NPF lenirtem atema tayongzükba kaji Nagaland nung NPF-i sorkar kümtettsüba lir. Iba atema asenoki mangatetteptsü agientsüla aser kati ka dang temulung lemtep aser tamang katettsüla. Party sasep nung angatettep nung dang asenoki takok angutsü” ta paisa ayongzük.
NPF-i party-i Party documentary ka adoktsüla aser ibaji NPF Central Office indang Archive room nung ayutsü akok. NPF ya regional Party tejentiba lir aser digitized form nung osangtem yutsübaji lanu putu tema tajangzük asütsü, kechiyong parnoki Naga loktiliba nung NPF party-i shilem agiba aser mapa inyakba osangtem memetet, ta TR Zeliang-isa shisem.
NPF president Dr Shurhozelie Liezietsu-ia tir o jembidang India sorkar aser Naga yimten teloktemi mapa tajung inyakba atema tenüngsang agütsü.
Naga nunger ya kibong ka dang aser kodang kibong ka nungi züngsemtmi külemi alitsü jangraba metetdaktsür, iba nung kecha tai mali aser iba atema asenoki asen kidangertem den-a shinga anema mapa tamajung meinyak, ta Dr Shurhozelie-i ashi.
“Burma nung alirtem dak alaka NPF-i asen nübortem temulungjang agibo külemi alitsüsa tensa ka bentsür aruogo. Künü anogo Naga nunger ajak külemi alitsü mapang ka arutsü aser iba alizüngji timi atongtsü atema onoki inyaker” ta paisa ashi.
“Onoki Naga nung lushi nung dang masü saka North East ajungalen yimjung bener arutsü atema temulung agütsür. NPF party ya Naga nunger atema dang masü saka North East nunger ajak atema lir” ta Dr Shurhozelie-isa metetdaktsü.
Tawa Party lennir aser Central youth ketdangpur kar tanga party nung adenba atema olen ka ashidang “iba party indang tangatetba sülen manidakertem aser party indang putiotsü memetetertemi party nung melitettsü. Ajisüaka, party nung bendanga agütsürtem ali tashi, nübortemi shisabulu masütsüla” ta paisa shisem.
Iba sentong nung Manipur State Unit tir Awangbow Newmai, Working President Joddik Tali aser Nagaland MLA Y M Yollow nungertemia tajungshi o tem jembia liasü.
Secretary general aser Rajya Sabha MP K G Kenye-i secretarial report metetdaktsü aser MLA Vikheho Swu-i 2019-2024 atema election board-i benokba osang aser ketdangpurtem tezüngzüktep agiba mapa agia lisü.
Sentong nung mendenji NPF working president Apong Pongener liasü, W Morung Makunga-i Lai zünga sarasadem, MLA Kuzholuzo Nienu-i tesentepertem pela agizük, Konyak Baptist Church Pastor Rev Phomlee Van-i ketdangpur tasentem meshiteta sarasademtsü aser Working president Dr Huska Yepthomi-i anküp tepela o jembi.