Naga yimten latettsü mapang agitsü: Neiphiu Rio

Kohima, November 22 (TYO): Naga yimten tatembang küma latettsü asoshi mapang tatsüka agitsü kechiyong Naga yimtem telok aika tsüngda telemsa adoka lir aser parnok melongjemteti lir, ta Nagaland Chief Minister Neiphiu Rio-i ashi.
Naga yimten ken o ya küm aika jembia arur October 31, 2019 nü olemtep tembanga angatettepogo, saka tenangzüktep agitsü atema ano teinyaktsü aika lir, ta Rio-i ashi.
Naga nunger yimten telok aika lemsa lir aser tatembang tenangzüktep ano sign masü. Naga nunger ya ka dang lir aser ken o ya Naga nunger ajak atema lir aser tenangzükba ka agi dang tembangtsü. Anungji Naga yimten telok ajak ka küma longjemtsü nüngdaker” ta paisa metetdaktsü.
Hokolbarnü Tuophema Village tentetba nüngshilung azüngba sentong nung Rio-i iba osang metetdaktsü.
“Tekaratiba nung tatembang telemtetba ka agitsü atema Naga nunger ajak külemi shisadangtsüla, kati ka angatetteptsüla aser longjemtsüla. Ajisüaka, Naga nunger lemsar dang lira, Naga yimten latettsü atema mapang agitsü,” ta paisa metetdaktsü.
Asenoki pei putiotsü aser tera metettsüla aser kati ka angatetteptsüla. Asenok shiba aser kong nungi aru ta asüba kanga junga metettsü tim. Naga nunger sobaliba ya asenoki wazüka ayutsüla aser ajungkettsüla, kechiyong iba ajanga Naga nunger balaka ta asüba alima dang ayur, ta Rio-isa ashi.
Lanurtemi anüolen tsütsü aliba sobaliba ajizüka benshiba ya tebilemtsü ka lir. Naga nungeri lanurtem asen tetsü-tebou ken aser tsüngsangtem sayua sobaliba angazükdaktsütsüla, ta paisa ayongzük.