Konger tsünüba indang training tembangogo

Kohima, Yimpoksüi/November 25, 2019 (TYO): Phek district nung Micro Enterprise Development Programme (MEDP) tawabangbangba kübok SHGs atema konger tsünüba aser Vermicomposting nung ayongzüktsüba training sentong anogo 13 buba Hombarnü Pfutsero nung tembangogo, ta sangdong ka ajanga metetdakja liasü.
Iba sentong achaayangtsü asoshi Chakhesang Women Welfare Society (CWWS) den NABARD longjemer sponsor süa liasü.
Iba training sentong shibangba mapang Imsunaro DDM Phek, NABARD, Mhathung Khuvung Branch Manager, NSTCB Pfutsero Branch aser subject expert Dr. Esther T. Longkumer, ACTO, Soil Science KVK Phek nuger arugi denogo.
Sentong nung shilem agitem dang bank nungi teyari meshia konger tsünüba aser Vermicomposting maparen inyaktsü asoshi o jembir temi ajungshia liasü.
Iba maparen tenzüktsü asoshi, sentong nung shilem agir ajak nem ‘mushroom spawns’ agütsü.
Maneni, sentong nung SHG züngsem, Ngunyi-u Khape-i lai konger tsünüba nung ajangshibatem lemsatep aser kasa mapang CWWS programme coordinator, Zechete-u Nusory-i tatembang o jembi.