Naga lanurtemi linük tenzüktsü jangrar: GPRN

Dimapur, November 25 (TYO): November 21, 2019 nü PRO (Defence) Lt. Col. Sumit Sharma-i Mon nung NSCN (IM) nung züngsem aniokba maparen ka puteta anendaktsü ta osang sangdongba atema Government of the People’s Republic of Nagalim (GPRN)-i o meyiptsüogo.
Küm 70 dak tema tejaklen Naga yimten mapa inyaktsü tenzükba nungi, Naga lanurtemi Naga lima tenzüktsü tejangraba kanga inloka arur kechiyong parnoki Indo-Naga yimten tebilemtsü ya kanga tongtipang ta züngshir, ta GPRN-i metetdaktsü.
Naga yimten maitsü aser putiotsütem kümzüka ayutsü atema lanurtemi NSCN aser tangta yimten teloktem nung adener, ta MIP sangdong ka nung ashi.
PRO (Defence)-i NSCN anema osang tiyazü prokshi aser iba ya putiotsü temeten anema inyakba mapa ka lir. Naga nungertemi Naga lima indang yimten mapa inyaktsü jangraba ya mezüngmeshi masütsüla aser aibelena mangatettsüla, ta MIP-isa ashi.
Assam Rifles aser Indian Army sepaitemi osang tiyazü prokshitsü merangyonga, Naga yimten tebilemtsü ajanga Naga lanurtemi maneni ajungmesotsü. Naga lanurtemi Naga national service nung pei sasa adentsü mulungtetba ya ceasefire ground rules (CFGR) alema masü. Parnok ya telok kar mesüra NSCN-i tashiyim agi dendaktsürba masü, ta MIP-isa metetdaktsü.