Ochimashi tamajungtiba

Koba mapa nung südir süaka ochimashi mapaji kanga majung aser iba jagi kibong nungi tenzüker loktiliba aser yimten maparen ajak menenja takoksa bener arur. Ajisüaka, ochimashi mapasa asüyonga asen lima nung government mapa ayokba indang jembiba ya shitak asünungbo, iba ochimashi mapa yabo tamajungtiba rongnung tamajungtiba asütsü. Aji oda, külen election mapang sen agi vote alia adoker aser ano külen government mapa bazar nung jangotsü shishilembar amai ayoker aser alir ta süra, Nagaland ajungtsü asoshibo teimla tilakata magütsür. Kechi mapa nung südir süaka, teinyaksangji mapa inyak metetba ochishir aser nendaka inyakba nisung asütsüla. Pai mesüra lai inyakba mapaji sen atema masü saka pei lima aser nübortem asoshi inyaktsüla. Inyaker asoshibo taa lir, anungji sen atema inyakba agi masü saka nübortem tenzükba agi sen dena ajangzüktsü. Tanübo asen lima nung government mapa nung inyakertem ya teimbaka pei lima aser nübortem asoshi inyaker masü saka sen angutsü atema inyaker. Ibayongji, government mapa ya temsüa alir aser pei lima tenzüktsü jangraa alirtem asoshi masü saka sen meimertem asoshi bazaar oset ka amai dang kümogo. Iba jagi pei lima aser nübortem tenzüknertem kar government mapa nung aliyonga parnokji dena sen agi atidangba tatidang nung tsükadoker. Atangji, government mapa ayoker aser alir saka kuli bushidangbo mangutsüa akok, kechiyong shibaibo sen agi government mapa ayoker mesüra sen agi mapa alia ta shitettsü. Ajisüaka, mi mapu nung mokozü adoktsü na ta jembiba amato, tayoker aser talir aliba agiang kinükkisang ajak nung government mapa ayokba indang jembir. Ajisüaka, tanü asenoki government mapa ayokbaji asenoki asen tsükchirtem dang asen lima ayoker amai asütsü aser asenok government mapa sen agi alia aibaji tasoba anogo nungi auyatsü tenzüker amai asütsü. Kanga shisabolutsüba kaji, tanga mapatemjibo yutsür, tatishitsü agi, nisung kari tesayur mapa sen agi alia ainung, item jagi kaketshirtem dang koda meima sayutsü ? Item jagi tarutsü asen lima tajungba küma yangertettsüsa parnok nükla nung yur kechikomaka parnoki sayuba tanurtem dang sayutsü. Item jagi tanurtem dang ochishia alitsü indang koda sayutsü ? Iba kasaji lanurtem kar sen agi alia sepai mapai ainung, parnok jagi kodaser asen lima meima ochishia tenzüktsü ? Sen agi alia aiba sepai kati kodaser pei lima aser nübortem asoshi taküm bendanga agüja tenzüktsü ? Sen agi alia aiba sepai kati kodaser ochimashir putettsü ? Ano, iba kasaji tanga department-tem mapa nung sen agi alia aisang aser aila tenzüker jagi koba tashika pei mapa nung ochishia tenzüktettsü. Atangji, government mapa ayokertem dang yabo nisungi kecha meshitetyonga Tsüngremi inyaktsü. Kechi kodaser government mapa ayokba sen agi kibong azükarutsü aser taküm arishia alitsü. Item rongsentemjibo temoatsü masü saka tashidakang kümadoktsü. Tanü Naga lima ajungtsü jembiba nüngdak ya shitak ataloktsü asoshi tamasa asenoki government mapa senyong ayokba sobaliba tamajung ya anenadoktsüla. Asenoki tai maketba chirnur aser lanurtem mulungjang meyirudaktsüli aser parnok shisatsü memenendaktsüli. Lanurtembo tajung inyaktsü bilema arur saka asenoki sen agi government mapa alia aitsü lenmang sayur. Lanurtemibo asen lima meima ochishia tenzükner saka asemoki parnok dang mapa ajak nung ‘commission’ agitsü sayur. Lanurtemibo shitak inyakner saka asenoki tangar taila nisung tenüng nung ita sen dena agizüka agitsü sayur. Asenok taintem aser lenirtem ya tajung tazü masü. Nisung ya amtsük (sen) tetsa agidangbo taküm malir ta asüba ya asenoki angatettsüla. Amtsük agidang mesüra sen agidang taküm jangratema alitsü asübo yashi meshitaklen nungi akartemang jangratema lila. Joko, asenok tan südi aser asen lima aser nübortem meimdi aser Tsüngrem tsübua kechi ochi aji inyaktsü merangdi.