Angh-i Rengma nunger den Ngada benjung salem lemsatep

Dimapur, Yimpoksüi/November 26 (TYO): Nagaland Angh RN Ravi-i Rengma nunger aser iba tebor tajung benjung amunger ajak den Ngada benjung salem lemsatepogo.
Angh Ravi-i, alu junga rutettsü atema tenüngsang agütsüba benjung amungba ajanga Nagaland nung aliba kin ajak ka küma longjemdaktsütsü imlaba lemsatep.
Angi-sa, par kin inyaksangshi ajak yimjiyimjung nung aotsü asoshi imlatsüba den Nagaland nung aliba nüburtem yimjung, tepela aser lenla ajak nung renloka aotsü asoshi tulusang dang sarasademtsüba lemsatep.
Paisa, Naga kin balala sobaliba kanga takar lir ta ashiba den, item sobaliba ya wazüka ayutsü aser ajungkettsü ajungshi. Maneni pai lanurtem dang pei sobaliba tajung asoshi nema danga bilemba den taküm lenmang ajak nung temaba jenjang tongtettsü atema aliba den liromedema aintsü ajungshi, ta PRO, Governor sangdong ka ajanga metetdaktsü.