BJP-i ‘washing powder service’ tenzüka lir: Gaurav

Guwahati, November 26 (Agencies): Narendra Modi-i aniba BJP sorkari parnok den toktepba political party nung züngsemtem atema ‘Nirma washing powder service’ amshir, ta Assam nung Kaliabor Lok Sabha MP Gaurav Gogoi-i ashi.
BJP nung adenba Congress yimsüsür aikati ‘Nirma washing powder service’ amshir.
Kang dang nüngtugu Nirma washing powder yagi süoshi nungi arr odaktsür aser taoba Congress yimsüsür aikati taoba mapang ochimashi inyakbatem agientsü atema ‘Nirma washing powder service’ amshir, ta Gogoi-isa metetdaktsü.
Assam, West Bengal, Karnataka, Goa aser tang Maharashtra nung taoba Congress yimsüsür aikati BJP nung adentsü atema ‘Nirma washing powder service’ amshir, ta paisa shisem.
“2014 küm nungi PM Modi aser HM Amit Shah nati washing powder service tenzük. Party nung denang aser taoba mapang ochimashi inyakba taraktem agienang ta tenati ashir. Assam, West Bengal, Karnataka, Goa aser Maharashtra nung yimsüsür aikati BJP nung dena iba service agir” ta Gogoi-i tai tongloktsü.
2019 Lok Sabha elections jakdang Congress yimsüsür aikati Congress party junga ketdang masür ta shia party toktsür BJP nung aden.