Tripura CM-i PM den union minister tem den ajurutep

Agartala, November 26 (Agencies): Hombar nikongtsütsü Tripura chief minister Biplab Deb-i New Delhi nung Prime Minister Narendra Modi aser union minister 5 den ajurutep.
Tripura CM-i PM Modi den ajurutepdang Tripura nung tang teinyakdak mapatongtem indang osang lemsatep.
“Tanü künati onük aika lemsatepogo. PM-i mapa inyakba atema pelaa agizük aser maneni yaritsü nangzük” ta Deb-i Twitter nung metetdaktsü.
Tripura nung tang teinyakdak mapatongtem atema Chief Minister Deb-i Rs 1,000 crore dak tema meshi, ta osang ajanga ashi.
November 25 ya Biplab Deb indang tasoba anogo liasü aser pai iba anogo tenüng nung PM aser union minister tem dang nungi temoatsütem meshi.
Deb-isa union defence minister Rajnath Singh, health minister Dr. Harsh Vardhan, DoNER minister Dr. Jitendra Singh, minister of state for power & renewable energy R.K Singh aser textiles minister Smriti Irani nungertem den ajurutep.
DoNER minister Jitendra Singh den senden amendang CM Deb-i Autonomous District Council (ADC) areas nung gari lenmang aser tanga mapatongtem inyaktsü atema teyari meshi.
Paisa union health minister Harsh Vardhan dang Dhalai district nung district hospital ka lapoktsü atema teyari meshia liasü.