NRC inyakra CM menden samatsü: Biplab Deb

Agartala, November 26 (Agencies): Tripura chief minister Biplab Deb-i National Register of Citizens (NRC) indang olen ka jembiba atema social media nung o atsüteptsü tenzükogo.
Tripura nung National Register of Citizens (NRC) inyakra, pai chief minister menden yutsütsüsa akümtsü ta Deb-i ashiba video clip ka social media nung kanga prokshir.
“Kübo aser ozü kinungertem Bangladesh nungi aru. Pai citizenship card angu, iba sülen ni Tripura nung aso. Anungji, NRC ajanga kari dang takoksa angutsü süra, ni mezüng chief minister menden toktsütsüsa akümtsü. Ni CM menden yutsütsüsa NRC mapa inyakdi ma?” ta Deb-i video nung shia lir.
Iba video ya Facebook, Twitter aser tanga social media aika nung prokshir aser nisung aikati tebilembatem lemsatepdar.
West Bengal kübok Raiganj aser Kaliyaganj nung by-election agitsü aliba atema anogo asem tejakdang Deb-i nüboyimtsü atema ao aser idangji pai osangbener den jembidang iba video ya agiba liasü.
Ajisüaka, Biblab Deb atema media advisor Sanjay Mishra-ibo iba video clip ji nisung kari mapa tamajung inyaktsü atema amshir ta tai tongloktsüogo.
Iba mapang Biplab Deb-i NRC aser Citizenship (Amendment) Bill ji India sensotem kümzüktsü atema lir ta jembi, ta Mishra-i ashi.