Uddhav Thackeray-i Maharashtra CM inyaktsü

Mumbai, November 26 (Agencies): Maharashtra nung Chief Minister inyaktsü alisang Uddhav Thackeray-i tanü Congress president Sonia Gandhi nem tenüngsang agütsü.
“Ni kodanga Maharashtra nung chief minister inyaktsü mepungmang dang” ta Uddhav-i ashi.
Arishi küm 59 tain Uddhav-i Deobarnü tezüngzüktep agitsü ta osang ajanga ashi.
Tanü Supreme Court-i asüng floor test agitsü atema tetuyuba agütsüba sülen BJP lennir Devendra Fadnavis-i Chief Minister menden toktsü.
Züngsem 288 agi akümba Maharashtra assembly nung majority mark ji 145 lir aser parnok ket nung nübo peria mali ta shia Fadnavis-i anogo asemnü dang chief minister inyaker tanü menden toktsüba shidi Governor nem agütsü.
Nationalist Congress Party (NCP) lennir Ajit Pawar-i MLA 54 anir arutsü ta nangzükba sülen deputy Chief Minister inyaktsü atema tezüngzüktep agi saka pai ibaji meinyakteti tanü deputy Chief Minister menden nungi anenogo.
“Ni state len anitsüba ya kodanga mepungmangdang. Ni Sonia Gandhi aser tangartem dang pelar. Kati ka dak tamang akaba ajanga onoki linük len tasen kati anir” ta Uddhav-i Sena-NCP-Congress külem senden ka nung jembidang ashi.
Uddhav ya Shiv Sena tenzüksang Bal Thackeray’er jabaso tasembuba lir aser Thackeray’er kibong nungi mezüngbuba Chief Minister ji pa asütsü.
“Devendra Fadnavis-i asüngdangba ajak langzütsü ni renema lir. Ni kecha metsübur. Tiyazü jembiba ya Hindutva nung maden. Nenoki nüngdakdang onok dak azüiter aser menüngdakdang nenoki onok toktsür” ta Uddhav-isa ashi.
Uddhav den Congress aser NCP nungi deputy chief minister ka ka inyaktsü ama bilemer. Osang ka ajanga Balasaheb Thorat (Congress) aser Jayant Patil (NCP) nati Deputy Chief Minister inyaktsü ta metetdaktsü.
“Ajit Pawar-i menden toktsüogo aser pa onok den lir. Uddhav Thackeray ya küm 5 atema Uddhav Thackeray nung chief minister asütsü” ta Shiv Sena lennir Sanjay Raut-i ashi.