Dimapur nung IFOAM Asia Organic Youth Forum tenzükogo

Dimapur, November 26 (TYO): Mongulbar nungi Niathu Resort, Dimapur nung 5 buba International Federation of Organic Agriculture Movements (IFOAM) Asia Organic Youth Forum tenzükogo.
Iba sentong ya Nagaland sorkar aser Nagaland Organic Konnect ajanga ayongzüker.
Organic farming indang osang metetdaktsütsü atema aser ano sendaktepa alirtem asoshi trainings aser capacity building programs agitsü nükjidong nung iba sentong ayonga agir.
Aluyimba aser chiyungtsü dak sendakba wadang nung tazünger, shia meteter aser lanru entrepreneur tem nüngdaker, ta Agriculture Minister G Kaito Aye-i o jembidang ashi.
Lanurtemi aluyimba mapa nung shilem agitsüla kechiyong iba ya kodanga mesamatsü aser aluyimba melira, chiyungtsü mangutsü, ta Kaito-isa ashi.
Nagaland nung Agriculture department-i aluyimertem den külemi inyaka arur aser scientific teyari den education agütsüba nung terenlok lir. Ajisüaka ano teinyaktsü aika lir, ta paisa ashi.
Iba sentong agiba ajanga organic agriculture aluyimertem asoshi maongka aika agütsütsü aser alima map nung Nagaland adentsü, ta Agriculture Minister Kaito-isa metetdaktsü.
Iba sentong nung IFOAM Asia Tir Zhou Zejiang-i okila jembi aser NOK Tir Dr. Akali Sema-i Nagaland Organic Konnect indang osang lemsatep.
Bendang linüktem nungi lanur lennir 8 dena nisung ajak agi 35 iba sentong nung adener.