BJP-i Pragya Thakur Defence Panel nungi anendaktsür

New Delhi, November 28 (Agencies): Bodhbarnü BJP lenir aser MP, Pragya Thakur-i Lok Sabha senden nung Nathuram Godse (Mahatma Gandhi khasetsang) ji linük meimer ka liasü, ta jembiba o BJP-i aitsüogo, aser Brihostibarnü BJP-i Parliament senden aliba piyong BJP parliamentary party senden nung la medendaktsütsü atema lemtetba den Parliamentary committee on defence züngsem nungia anendaktsüogo.
BJP working president, J P Nadda-i, Pragya Thakur-i tashishitsü o jembiba atema la nem temerenshi agütsür aser la consultative committee on defence züngsem nungia anendaktsütsü, ta metetdaktsü.
Lok Sabha nung Special Protection Group (Amendment) Bill onük nung o lemtepba mapang Thakur-i tashishitsü o ya jembia liasü.
New Delhi nung osangbenertem den jembidang Nadda-i, “MP, Pragya Thakur-i jembiba oji aitsütsü tetemsü. Item ama oji BJP-i pu-masemer aser iba tangatetbaji onoki pu-masemer. Onoki Parliament mapang BJP parliamentary party senden nung Thakur medendaktsütsü atema telemtetba agiogo,” ta metetdaktsü.
Yashi Lok Sabha nung DMK lenir, A Raja-i Godse-i Mahatma Gandhi khasetba kuli court nung agütsüdang jembiba o ka lepshia liasü, aser iba mapang nungji Pragya Thakur-i Godse ji linük meimer ka liasü, ta jembi.
Thakur-i jembiba oji opposition-i ashishia longkak aitba sülen Lok Sabha Speaker, Om Birla-i, DMK leniri jembiba oji ang record nung ayutsü, ta metetdaktsü.
Lok Sabha election 2019 atema nüboyimba mapang nunga Thakur-i Godse ya linük meimer ka, ta jembiba atema yimtenren nung tashishitep tulu adoka liasü, tesülen lai tatok meshi. Ato kilonser Modi-ia lai jembiba o aija liasü.