Manipur CM-i tenokdangba agütsür aliba agintsü mepeshi

Imphal, Yimpoksüi/November 28 (Agencies): Manipur chief minister N Biren Singh-i Bodhbarnü Coordinating Committee on Manipur Integrity (COCOMI) dang Manipur Sangai Festival nung shilem magitsü asoshi lateter aliba agintsü mepeshiogo.
COCOMI ya lokti tentet tongtibangtem teloktep lokti ka lir aser parnoki Manipur nungertem tejangraba kümzüka ayutsü asoshi khanga, tang agia aliba Sangai benjung nung shilem magir.
Chief minister, secretariat Durbar Hall nung osangbenertem den sensaksemba mapang Biren Singh-i, Manipur Sangai Festival ya Manipur nungertem tarutsü asoshi ayongzükba lir, ta ashi.
Paisa, iba benjung ya Manipur asoshi nemadangtsü maparen ka dang masü saka alima matsüngdang state maitsü ajungkettsü asoshi lir, ta ashi.
COCOMI team aser union home minister Amit Shah senden amenba indang jembidang N Biren-i, tang Parliament session tagidak aser Maharashtra amala nung yimden yimsüsüba tsütsü timtem adoker aliba ajanga mapang meliaka Amit Shah-i ghonda ka dak tali mapang agütsü, kong COCOMI lenirtemi tang Naga yimjung ken o jembia aliba dak sendakba nung Manipur nunger tejangraba union home minister den lemsateptsü asoshi maongka angu, ta ashi.
Paisa, COCOMI lenirtem angadangba sülen union home minister-i Naga nunger yimjung ken o asoshi jembishinüa aliba ajanga Manipur nunger tejangraba dak khenyongi mekongshitsü, ta tenangzükba agütsüogo, ta ashi.
Assembly session ka akatsü asoshi akhangba dak sendakba nung chief minister-i ashiba agi Manipur Legislative Assembly Winter Session December 20 nü nungi tenzüktsü.
Takhangba anaprongla ataloktsür asünung COCOMI-i parnok tenangzükba meraksai state ajungtsü mechi tenokdangba agütsür aliba agintsüla, ta pai ashi.
Home minister aser COCOMI senden amenba sülen Biren Singh-i ashiba agi, pai Citizenship (Amendment) Bill dak sendakba nung tanga sensaksem ka agiogo.
Sorkar dak temulung alemtsü asoshi mepeshia Biren-i, state tejangraba aser lisopurtem anema langka danga inyakra tang aliba sorkari odangbo repranga metoktsütsü, ta ashi.
Deputy chief minister Y Joykumar aser works minister Th Biswajit, MLA tem aser ketdangsertem iba press conference nung dena liasü.