Mapai aotsüla

Nagaland Civil Secretariat nung inyakertem den yakanü Chief Secretary-i jembidang, parnok aika office-i junga maruba tebilemtsü indang lemsatepbaji kibong nung tebui tanurtem dang pei mapa nung temulung agüja inyaktsü ajungshir amai lir. State government mapa inyakertem rongnung tongtibangtiba telokji Secretariat nung inyakertem ya lir, kechiyong nübortem asoshi telemtetba agidakji Secretariat lir.Government-i mapa koka inyaktsübaji Secretariat nung inyakertem dak keta lir. Aji oda, Nagaland nung ochi yimsüsüba mapang tasen ka tenzükdi süra, ajia Secretariat nungi tenzüktsü. Secretariat nung nübortem asoshi maparen tapu balala inyakba file-tem koma karaa arakzür, yamaji government mapatem karaa inyaktettsü. Government ajung majung, tashi ait asü mait, item tia jenjangji Secretariat purtemi file nung züluba dak tuluka keta lir. Mapa inyaksang mesüra inyakla kenü officei maruba ajanga file ka table ka nungi ka metongtetba jagi nübortembo kanga akoksatsü. Iba khuret aser tangatetbaji bener government mapa inyakertemibo kenü sodi agitsübajia magitet anogo shia mapai arutsü. Atangji, nübortem tenzükba mapa nung anogo shia mapai arutsübaji, Secretariat nung inyakertem dang masü saka government office nung inyaker peon aser chowkidar nungi tenzüker ketdangser tulutiba tashi, ajak asoshi kanga tenüngdaktsü. Kecha lima nunga aser mapa inyakdak kecha nunga pei arunüdang arutsü aser marunüdang marutsü ta asüba mapa inyakdak office mesüra tesembo kecha nung maka. Pei kija lu ayim nunga, pei onüdang aotsü aser mounüdang maotsü ta masü saka onüyonga mounüyonga alu koka ayimtsü asoshi anogo shia aotsüla. Government mapa nung inyakertemi angatettsüba khuret kaji, parnok inyakba mapaji nübortem tenzükba mapa lir, anungji nübortem meima office mapa inyaktsüla. Talisa lanurtem mapa bushirtem asoshi anogo ka menuba jagia taküm nung tia tamajungnba kati ia adoktsüa akok. Ano, talang nungi Kohima tashi aruagi amongertem asoshia mapa inyaker offie-i maruba ajanga anogo ka menuba agi sentsü tulu tsüloktsüa akok. Item ajakji bilemdanga, tanü ni office-i mao nungbo nübortem akoksatsü ta rajema, kenüamati nübortem ajurutsü yongyaseta government office nung inyaktsüla. Government office nung inyakdang, ni kwika angur ta bilema masü saka küm ka nung nia nisung kwibo yaritetter ta bilema inyaktsü junger. Kodang asenoki tangar asoshi tajung inyaktsü bilema government office nung inyakdir, asenok teti pelaa alitsü aser anogo shia office-i onütsü saka kodang asenoki asen kija ajungtsü aser ajangzüktsü bilema inyakdir, idangjibo asenok tanüla dena mesüngjemteti akümtsü, idangji asenok dak nungi tesünep oa adoktsü. Aji oda, office-i teti arua nübortem yarirtem dang nungi office-i maru ser angati ita sen achirtem aser office-i maru tanga mapa inyakba nungi rongsen tuluba angurtemang timtatemba , mepelaba aser arishi tatsüba aliba asenok tenük agia angur. Asenoki government mapa dang inyakner, saka office-ibo monuner ta asüba tesüngmangtsü jakla aser tangatetba ya asenok dak nungi tanüsa endoktsüla. Ajaki government mapa bushir saka goverment mozü ki, government school ki, government tzübo, government lenmang, government electric light aser government kiojentem meima anepalurbo mali. Item jaklatemji kodang asenoki asadangdir, government mapa bushiba ya mapa inyaktsü bushir masü saka ita sen achitsü bushir ta angatetter. Mapa meinyaki chiyonga alitsübo asenok ya jail nung amongang shitak asütsü. Atangji, mapai aotsübaji government office nung inyakertem asoshi dang tongtibangba masü saka private nung inyakertem aser asenok pei mapa inyakertem asoshia kanga tongtibang lir. Mapa inyakertem dang mapai shitak arung ta shidaktsübaji taküm nung tamakok aser maksü tuluka ajuruogo ta bilemdi. Asenoki inyakba mapa ya Tsüngremi agütsüba mapa ta bilema asenoki inyakra, mapaji Tsüngrem külemer ama bilema shitak jangratema inyaktsü aser mapaji yamaji inyaktsüla.